OQO-da jyl sońyna deıin 19 eldi mekenniń jerasty sý qory bekitiledi

ASTANA. QazAqparat - Ońtústik Qazaqstanda jyl sońyna deıin 61 eldi mekende geologııalyq izdeý-barlaý jumystary bastalyp, 19 eldi mekenniń jerasty sý qory bekitilmek, dep habarlaıdy oblystyq ákimdiktiń baspasóz qyzmeti.

Qazirgi tańda óńirimizde jerasty sý qoryn bekitýdi qajet etetin 383 aýyldyń 244 eldi mekeninde atalǵan jumystar atqarylǵan. Oblystyń 2016-2020 jyldarǵa arnalǵan damý baǵdarlamasyna sáıkes, 2020 jylǵa deıin jerasty sý qory bekitilgen eldi mekender sanyn 383-ke jetkizý josparlanýda. Bul týraly oblystyq energetıka jáne turǵyn úı-kommýnaldyq sharýashylyǵy basqarmasy basshysynyń orynbasary Á.Ábdiqadyrov habarlady.
 

Sonymen qatar, «Óńirlerdi damytýdyń 2020 jylǵa deıingi» memlekettik baǵdarlamasy aıasynda, 2017 jyly aýyz sýmen qamtamasyz etý salasynda 26 nysannyń qurylysyna 3,1 mlrd. teńge bólingen. Bul qarjyǵa, negizinen, sý qubyry múldem joq 10 eldi mekenge (ıaǵnı, 12 335 myń halyq) jańa aýyz sý qubyrlarynyń qurylysy júrgizilip, paıdalanýǵa berý josparlansa, 3 eldi mekendegi (6,2 myń halyq) tozyǵy jetken aýyz sý júıeleri jańartylady.

Nátıjesinde, oblystyń aýyz sýmen qamtamasyz etý deńgeıi qalalarda - 94,2 %  (1204,3 myń adam), aýyldyq eldi mekenderde - 74,2 % (620 e.m.) jetkizý josparlanýda.

Budan bólek, oblystyń Qazyǵurt, Saryaǵash jáne Maqtaaral aýdandarynyń 800 myńnan asa halqyn sapaly aýyz sýmen qamtý ózekti másele bolyp otyr. Bul máseleni sheshý maqsatynda Ógem ózeninen kólemi sekýndyna 3-3,5 m3-qa deıin sýdy buryp, aýyz sý retinde paıdalaný qarastyrylýda.