OQO-da jyl basynan beri 6 ret poıyz temirjoldan shyǵyp ketken

ShYMKENT. QazAqparat - Ońtústik Qazaqstan oblysynda jyl basynan beri 6 jyljymaly quram temirjoldan shyǵyp ketken. Abyroı bolǵanda zardap shekkender joq. Dese de kóliktik baqylaý ınspektorlary óńirdegi shoıyn joldyń kóbisi tozǵanyn aıtady, dep habarlaıdy QazAqparat HAA tilshisi.

Oblystyq temirjolshylar men prokýrorlar, kóliktik baqylaý ınspektorlary basqosqan jıynda kásipkerlerdiń shoıynjoldy kútip-qaramaýy sóz boldy. Saldarynan osyndaı keleńsiz jaǵdaılar oryn alǵan. Máselen, ótken jyly vagondardyń relsten shyǵyp ketýi boıynsha  7 jaǵdaı tirkeldi.  Sonyń bireýinde órt shyǵyp,  1,5 mıllıard teńgedeı shyǵyn kelgen. Kóliktik baqylaýshy ınspektorlar endigi kezekte kemshilikterge jol bergenderge qatań ákimshilik sharalar kóriletinin eskertti. Olar qazirden bastap temir joldardyń jaǵdaıyna tekserý júrgize bastaǵan.

«Biz tekserý júrgizý barysynda kemshilikterdi anyqtasaq, ondaı shoıynjoldardyń qyzmetin toqtatatyn bolamyz. Erteńgi kúni túsinispeýshilik bolmas úshin biz qazirden bastap barlyǵynyń basyn qosyp, túsindirý sharalaryn júrgizip jatyrmyz», - deıdi OQO kóliktik baqylaý ınspektsııasynyń bólim bastyǵy Saparbek Týrdalın.

Aıta keteıik, búgingi tańda shoıyn joldar jekeniń qolyna ótip ketken. Óńirde 200-den asa kásipker temirjoldardy menshiktep alǵan. Alaıda olardyń basym kópshiligi temir joldarǵa qarajat jumsaǵysy joq.