OQO-da jurtshylyqqa jańa Salyq kodeksiniń jobasy túsindirildi

ShYMKENT. QazAqparat - Ońtústik Qazaqstan oblysynda salyq tóleýshilerge ońtaıly jańa Salyq kodeksiniń jobasy túsindirý boıynsha óńiraralyq kóshpeli semınar ótti. Basqosýǵa Qazaqstannyń salyq tóleýshiler qaýymdastyǵynyń keńesiniń tóraıymy Janat Ertilesova men keńesshiler, QR Ulttyq ekonomıka mınıstrligi Salyq jáne keden saıasaty departamentiniń dırektory Azamat Amrın qatysty, dep habarlaıdy QazAqparat tilshisi.

Jıynǵa sondaı-aq, QR QM Memlekettik kirister komıteti tóraǵasynyń orynbasary Arǵyn Qypshaqov bastaǵan mamandar jáne ýákiletti organdardyń ókilderi, Ońtústik Qazaqstan, Jambyl jáne Qyzylorda oblysynyń salyq tóleýshileri men Memlekettik kirister departamentteriniń basshylary jáne qyzmetkerleri  de arnaıy shaqyryldy.

Qazaqstannyń salyq tóleýshiler qaýymdastyǵynyń keńesiniń tóraıymy Janat Ertilesovanyń tóraǵalyǵymen ótken semınarda Ulttyq ekonomıka mınıstrligi, salalyq mınıstrlikter, «Atameken» kásipkerler palatasy, QR Memlekettik kirister komıteti jáne bıznes qaýymdastyqpen birlese ázirlegen jańa Salyq kodeksiniń jobasy jumys tobynyń mamandarmen tanystyrylyp, talqyǵa salyndy.

Jıynda sóz sóılegen Ertilesova jańa Salyq kodeksindegi ózgerister salyq salý ıdeologııasyn ózgertip, salyq tóleýshilerdi qorǵaý men ekonomıkanyń mańyzdy salalaryn yntalandyrýǵa baǵyttalǵanyna nazar aýdara otyryp, jumys tobynyń kásibı mamandary jańa kodekstegi árbir ózgeris boıynsha toqtala  túsindiretinin aıtty.

Atap aıtqanda, joba azamattardyń salyqty óz erkimen tóleýge yntalandyratyn bolady. Barlyq túsiniksiz baptar salyq tóleýshiniń paıdasyna sheshilip jáne salyqtyq daýlardy ádil qaraýǵa múmkindik bermek. Sondaı-aq, jańa Salyq kodeksi jobasy ondaǵy baptar oqyǵanǵa jeńil jáne túsinikti bolýyn kózdeıdi.

Óz kezeginde, QR QM Memlekettik kirister komıteti Tóraǵasynyń orynbasary Arǵyn Qypshaqov sóz alyp,  jańa Salyq kodeksiniń jobasy boıynsha salyq tóleýshi salyq organynyń túsindirýine sáıkes áreket etken jaǵdaıda, aıyppuldar men ósimpuldardy qoldanbaý usynylatynyń jetkizdi. Sonymen qatar, salyqtyq tekserý aktilerinde tıisti negizdemelerdiń bolýy kózdelgeni týraly aıtty.

Shara barysynda, salyq tóleýshilege jańa jobada shaǵyn jáne orta bıznesti damytý úshin qoldanystaǵy arnaıy salyq rejımderi saqtalyp, shyǵystardy esepke alý arqyly jeńildikter berý qarastyrylǵany aıtyldy. Sondaı-aq, jańa joba boıynsha endi azamattar kásip bastaýy úshin tirkeýsiz,  kásip bastaǵany týraly memlekettik kirister organyna eskertip habarlandyrý jiberedi. Habarlamany alǵan salyq qyzmetkerleri bir jumys kúninde kásipti tirkeıdi.

Basqosýda jumys tobynyń músheleri jańa kodekstegi basqa da ózgerister týraly túsindirdi. Atap aıtqanda, jańa Salyq kodekste agrarlyq sektorǵa yntalandyrý sharalary da usynylǵan. Jobada sharýa-fermer qojalyqtarynda, músheleri men jumysshylaryna salynatyn áleýmettik salyqty alyp tastaý usynylǵan. Sondaı-aq biryńǵaı jer salyǵyn tóleýshiler qosylǵan qun salyǵyn tólemeıdi. Aýyl sharýashylyǵy ónimderin óndirýshiler úshin qosylǵan qun salyǵy boıynsha jeńildikter, dúnıejúzilik saýda uıymynyń talaptaryna sáıkes, ishki óndiris taýarlary jáne ımport úshin salyq salýdyń teń sharty qoldanylýy tıis talabyna baılanysty joıylady.

Sonymen qatar,  QR QM Memlekettik kirister komıtetiniń jumys toby ınvestıtsııalyq jobalarǵa salyq salý, keıbir jeńildikter alynýy týraly ózgeristerdi túsindirdi.

Semınar sońynda salyq tóleýshiler tarapynan jańa Salyq kodeksiniń jobasymen tanysý barysynda týyndaǵan kókeıtesti suraqtarmen usynystar berildi. Kelip túsken suraqtardyń basym bóligi elektrondy shot-faktýralary, mindetti áleýmetti medıtsınalyq saqtandarý, salyqtyq teserýler, táýkelder basqarý júıesi, qosylǵan qun salyǵy, jer qoınaýyn paıdalaný salalaryna qatysty boldy. Óz kezeginde jumys tobynyń mamandary qatysýshylarǵa tolyqqandy jaýaptar berip,  usynystar men eskertpelerdi  qarap shyǵatyndyqtaryn  jetkizdi.