OQO-da jastar etnomádenı birlestikterdiń tóraǵalarymen kezdesti

ShYMKENT. QazAqparat - Ońtústik Qazaqstan oblysynda jastar etnomádenı birlestikterdiń tóraǵalarymen kezdesti. Shymkent agrarlyq kolledji janyndaǵy «Dostyq» klýbynda ótken kezdesýde latyn álipbıine kóshý máselesi sóz boldy, dep habarlaıdy QazAqparat HAA tilshisi.

«Rýhanı jańǵyrý - zaman talaby» taqyrybynda ótken jıynǵa qatysýshylar Elbasynyń «Bolashaqqa baǵdar: rýhanı jańǵyrý» maqalasyn talqylap, oı bólisti. Basqosýda sóz alǵan Ońtústik Qazaqstan oblystyq Qazaqstan halqy assambleıasy tóraǵasynyń orynbasary, koreı etnomádenı birlestiginiń tóraıymy Roza Pak latyn grafıkasyna kóshýdiń mańyzdylyǵyna toqtaldy.

«Elbasynyń baǵdarlamalyq maqalasy - bizge jańa múmkindikter ashyp, máńgilik el bolýǵa bastaıtyn mańyzdy qujat. Maqalada basym baǵyt retinde kórsetilgen latyn álipbıine kóshý - elimizdiń alǵa jyljýyna, jańa zaman talabyna saı ósip-órkendeýine úles qosary sózsiz. Jańa álipbı - zamanaýı tehnologııa tilimen úndes. Sondyqtan latyn qarpine kóshý - ýaqyt talaby. Kóshbasshy memlekettermen ıyq tiresip, jastarymyz básekege qabiletti bolý úshin ýaqyt kóshinen qalmaýy tıis», - dedi Roza Pak.

Jıyn barysynda oblystyq túrik etnomádenı birlestiginiń tóraǵasy Latıfsha Asanov latyn álipbıine kóshý bastamasy túbi bir túrki dúnıesiniń mádenı, ǵylymı, ekonomıkalyq baılanysynyń nyǵaıýyna mol múmkindik beretinin aıtty. Sonymen birge, ózara yntymaǵymyzdy saqtap, eldiń birligin nyǵaıtýdyń mańyzyna da toqtaldy.

Kezdesý sońynda qonaqtar stýdentterdiń saýaldaryna jaýap berip, aldaǵy ýaqytta jıi júzdesip turýǵa ýaǵdalasty.