OQO-da túrkitildes óner juldyzdarynyń kontserti ótti

ASTANA. QazAqparat - Túrki jurtynyń rýhanı da kıeli astanasy - Túrkistan tórinde búgin túrkitildes halyqtardyń áni áýelegen kún boldy. «Túrkistan - Túrki áleminiń mádenı astanasy» jylynyń saltanatty ashylýy men Naýryz merekesi aıasynda ótken merekelik Gala-kontsertte Túrkitildes elder men Qazaqstannyń 160-tan astam óner juldyzdary óner kórsetip, ánnen shashý shashty, dep habarlaıdy OQO ákiminiń baspasóz qyzmeti.

Halyqaralyq deńgeıde ótken sharany Sh.Qaldaıaqov atyndaǵy oblystyq fılarmonııanyń ánshileri «Naýryz» ánimen ashsa, Qazaqstan, Tatarstan Respýblıkalarynyń Halyq ártisi Nurjamal Úsenbaeva «Qazaq valsi» ánin oryndap, ǵajaıyp keshtiń jalǵasyn sheteldik óner maıtalmandarynyń kezegine berdi.

Atap aıtqanda, bul kúni Bolgarııadan kelgen «Týrksader Rodop Esıntılerı» ansambli «Trakııa» bıin bılese, altaılyq aǵaıyndar ulttyq ánderinen popýrrı oryndady. Majarstandyq óner ujymdary da bul keshte bar. Ondaǵy «Forras» ansambli vengr halyq ánin aıtyp, chývashtyq kúmiskómeı ánshi Vera Shýrkına óz tilinde án shyrqady.
 

Jalpy, Gala-kontserttegi merekelik 20-dan astam nómirde 10-nan astam sheteldik juldyzdar - grekter men soltústik Kıpr óner ujymdary, rýmyndyqtar, saha-ıakýttar, Moldavanyń Gagaýyz eli, qalmaq ulttary, Makedonııadan kelgen óner ujymy, mońǵoldyqtar, ózbekstandyq ánshi-bıshiler Túrkiniń tórinde ótken dýman toıda jyrdan shashý shashyp, bir jasap qaldy.

Qazaqstandyq mádenıet úzdikteri qonaq bolyp kelgen óner ujymdarymen kezek almasa óner kórsetip, Á.Beıseýovtiń «Shaqyrady kóktem», B.Oralulynyń «Dombyrasyn», N.Tilendıevtiń «Saryjaılaýyn», Ó.Altaevtyń «Qazaqstanym alǵa» ánderin oryndap, kópshiliktiń ystyq yqylasyna bólendi. Sondaı-aq, Gala-kontserttiń aıaqtalý sátinde S.Báıterekovtiń «Túrkistan» áni oryndalyp, ádemi keshtiń shyraıyn ashyldy.

Gala-kontsert jalǵasy oblys ákiminiń yqylas gúlderimen ajarlanyp, shara sońy otshashýmen árlendi.