OQO-da túrik kásipkerlerimen birlesken jobalar iske asyrylatyn boldy
Bul týraly Qazaqstan-Túrkııa ınvestıtsııalyq forýmy sheńberinde memorandýmdarǵa qol qoıý rásiminde belgili boldy, dep habarlaıdy «QazAqparat» HAA tilshisi.
Naqtyraq aıtqanda, forým aıasynda yntymaqtastyqty nyǵaıtý maqsatynda Túrkııanyń «Ostim» ındýstrıaldy aımaǵy men «Ońtústik» ındýstrıaldy aımaqtarynyń basqarýshy kompanııasy arasynda, Túrkııadaǵy Sakarııa qalasynyń Saýda-Ónerkásip palatasy men OQO Kásipkerlik palatasy jáne «Shymkent ÁKK» UQ» AQ arasynda sonymen birge, Túrkııanyń «Volkan Ambalaj» kompanııasy men «Ońtústik» AEA» Basqarýshy kompanııasy arasynda jáne Antalııa provıntsııasynyń densaýlyq saqtaý basqarmasy men OQO densaýlyq saqtaý basqarmasy arasynda memorandýmdar jasaldy.
Bul qujattar aldaǵy ýaqytta qazaq-túrik bısnesmenderiniń kásipkerlikti qoldaý tetikterin ilgeriletip, Túrkııadaǵy ındýstrıaldy aımaqtardyń jumys tájirıbesimen bólisýge, tıisinshe, bizdegi «Ońtústik» arnaıy ekonomıkalyq aımaǵynyń erekshelikterimen túrik kásipkerlerin tanystyrýǵa múmkindik beredi.
Eki jaqty qol qoıý sharasynan keıin oblys ákimi J.Túımebaev kelisimge kelgen túrkııalyq 5 kompanııanyń jetekshilerimen arnaıy kezdesip, aldaǵy baǵyt-baǵdardy aıqyndady.
Jalpy, búgingi tańda Ońtústik Qazaqstandaǵy túrkııalyq fırmalar men kompanııalardyń sany 30-ǵa jetip otyr. Bul eki el arasyndaǵy saýda-ekonomıkalyq qarym-qatynastyń joǵary dárejede damyp otyrǵanyn kórsetedi. Munan bólek, sońǵy úsh jylda túrkııalyq áriptestermen quny 33,7 mıllıon AQSh dollaryn quraıtyn 4 joba iske qosylǵan. Sondaı-aq, jalpy somasy 2,7 mlrd. AQSh dollaryn quraıtyn 18 jobanyń 6-aýy túrkııalyq kásipkerlerdiń qatysýymen iske asyrylýda.