OQO-da táýelsizdik jetistikterin baıandaıtyn kitaptardyń tusaýkeseri ótti
Sonymen birge, osy kúni kelýshiler nazaryna egemendik jyldarynda Elbasymyzdyń Ońtústikke jasaǵan saparlary men óńirde atqarylǵan ıgilikti ister baıandalǵan «Táýelsizdik Tuǵyrym» derekti fılmi tuńǵysh ret usynylyp, tanystyryldy.
«Otyrar» oblystyq ǵylymı-ámbebap kitaphanasynda ótken sharaǵa oblys ákimi Janseıit Túımebaev pen zııaly qaýym ókilderi, oblys ardagerleri men mádenıet jáne óner mekemeleriniń qyzmetkerleri, joǵary oqý oryndarynyń oqytýshylary, ǵalymdar jáne BAQ ókilderi qatysty.
Saltanatty sharada sóz bastaǵan oblys ákimi Janseıit Túımebaev shırek ǵasyrlyq osynaý uly dýmanda mundaı shyǵarmashylyq týyndylardyń jasalyp, keıingi urpaqqa estelik retinde qalýy mańyzdy ekenine toqtaldy. Sondaı-aq óńir basshysy Tuńǵysh Prezıdentimiz Nursultan Nazarbaev beınelengen 10 myń teńgelik jańa qaǵaz aqshanyń alǵashqy banknotyn kópshilik nazaryna usyndy.
«Táýelsizdik jyldarynda Elbasynyń elge sińirgen eńbegi orasan. Sondyqtan osyndaı sheshim qabyldanyp otyr. Munda Prezıdenttiń beınesi. Astananyń boıtumary sanalatyn «Báıterek». Eldigimizdiń elordasy. Yntymaǵy jarasqan kópultty xalqymyzdyń ortaq shańyraǵy - Qazaqstan kartasy. Táýelsizdiktiń 25 jyldyǵyna tartý retinde shyǵarylatyn 10 myń teńgelik jańa aqsha elimizdiń tarıhynan syr shertedi», - dedi Janseıit Qanseıituly.
Banknottyń ekinshi betinde «Qazaq eli» monýmentindegi kıeli samuryq qus, «ómir aǵashy» kórinis tapqan. Bul - tarıhı tamyry tereńnen bastaý alatyn egemendi eldiń beınesi.
«Elbasy men Táýelsizdik egiz uǵym. Óıtkeni Qazaqstandaǵy qaıbir jetistik te Ult kóshbasshysynyń janqııarlyq erligimen, eldiń eren eńbegimen tikeleı balanysyp jatyr. Muny sizder Táýelsizdiktiń 25 jyldyq mereıtoıyna oraı oblysymyzda shyǵarylyp otyrǵan búgingi kitaptardan da aıqyn ańǵara alasyzdar», - dedi J.Túımebaev.
Oblys ákimi kitaphana basshylyǵyna Túrkııa elinen arnaıy joldanǵan Elbasy týraly birneshe jýrnal men kitaptardy da tartý etti. Túrik eliniń sazgerleri ázirlegen Elbasy týraly ánder jınaǵyn da arnaıy tanystyrdy.
«Táýelsizdik tebirenisteri» kitabynda óńirimizdiń aıtýly qalamgerleriniń týyndylary jınaqtalyp, jarııalanǵan. «Qazyǵurt» baspasynan 1000 danamen jaryq kórip, tusaýy kesilgen jınaq «Poezııa», «Proza», «Pýblıtsıstıka» atty úsh bólimnen turady.
«Táýelsizdiktiń 25 juldyzdy sáti» kitabynda - Ońtústik Qazaqstan oblysynyń shırek ǵasyrdaǵy jetistikteri baıandalady. Munda óńirdegi ár sala boıynsha 25 jyldyq kórsetkishter pash etilip, oblys halqynyń osy shırek ǵasyr ishindegi tar jol, taıǵaq keshýden ótip, nebir qıyndyqqa qaıyspaı etken eńbegi, tógilgen mańdaı teri, qol jetken jetistigi qamtylady.
Al úshinshi basylym - «Qazaqstan joly: Ult kóshbasshysymen birge 25 jyl beıbitshilik pen jasampazdyq» halyqaralyq ǵylymı-tájirıbelik konferentsııasynyń qundy eńbekterinen jınaqtalǵan kitapta taıaýda Muhtar Áýezov atyndaǵy Ońtústiktik Qazaqstan memlekettik ýnıversıtetinde ótken halyqaralyq ǵylymı konferentsııadaǵy ǵylymı maqalalar oryn alǵan. Onda AQSh, Kanada, Irlandııa, Ońtústik, Koreıa, Reseı Federatsııasy syndy meleketter ǵalymdarynyń ortaq talqyǵa túsken 300-deı baıandamalaryn oqýǵa bolady.
«Táýelsizdik - tuǵyrym» derekti fılminde QR Prezıdenti N.Nazarbaevtyń oblysqa jasaǵan saparlary men óńirimizde atqarylǵan ıgilikti isterge qatysty ázirlengen. Elbasy ońtústikke 40-tan astam ret sapar jasasa, tek Túrkistan qalasynyń ózine 13 ret atbasyn buryp, onda 6 ret Memleket basshylarymen resmı kezdesýler ótkizipti. Fılmde Elbasynyń sol kezderdegi belgili bir qoǵamdyq qubylystar men oqıǵalarǵa baılanysty bildirgen pikirleri men aıtqan oılary kórsetilgen. Eńbek Ońtústik Qazaqstan oblysy ákimdiginiń tapsyrysy boıynsha «Saq» kınostýdııasynda jasalǵan.