OQO-da «Tamuqtan tiri qaıtqandar» kitaby jaryq kórdi

ShYMKENT. QazAqparat - Ońtústik Qazaqstan oblysynda  "Uly Otan soǵysynda qaza tapqan, habarsyz ketken bozdaqtardy izdestirý ádisteri jáne tarıhı sanany qalyptastyrýdyń ózekti máseleleri» atty semınar ótti.

Oblystyq tilderdi damytý, arhıvtermen qujattama basqarmasyna qarasty Shymkent óńirilik memlekettik arhıvi jáne "Serpilis" qoǵamdyq qorynyń uıymdastyrýymen ótken sharaǵa tutqynda bolǵan 96 jastaǵy ardager men jaýapty mamandar, úkimettik emes uıymdar men qoǵam belsendileri qatysty, dep habarlaıdy QazAqparat tilshisi.

Elbasynyń «Bolashaqqa baǵdar: rýhanı jańǵyrý» atty baǵdarlamalyq maqalasy aıasynda uıymdastyrylǵan semınarda jınalǵan qaýym aldymen Qazaqstan ulttyq arnasynyń «Jýrnalıstik zertteý» baǵdarlamasy túsirgen derekti fılmdi tamashalady. Ótken ǵasyrdyń eń alapat soǵysy kezinde tutqynǵa túskender týraly maǵlumat aldy. Kontsentratsııalyq lagerlerde azaptalǵan, ajal qushqan, al keıbireýleri sol zulmat kúnderden aman -esen elge oralǵandardyń ómirimen tanysty. Sondaı-aq kezdesýde jalpy jurtqa arnalǵan, «Uly Otan soǵysynda» áskerı tutqynǵa túsken áskerler jaıly jazylǵan "Tamuqtan tiri qaıtqandar" kitaby kópshilik nazaryna usynyldy.

Jalpy, Qazaqstan soǵys jyldarynda  qyzyl áskerge 1,2 mln adam jiberip, olardyń árbir ekinshisi  soǵysta qaza tapsa, 200 myńy tutqynǵa túsken. Al, jańadan jaryq kórgen kitapta ekinshi dúnıejúzilik soǵysta Ońtústik Qazaqstan oblysynan maıdan dalasyna shaqyrtylǵan jaýyngerlerdiń  basynan keshken qıyndyqtary, soǵys jyldarynan keıingi ómir jolynyń qalyptasýy baıandalady.