OQO-da soǵys ardageri 53 shóbere jáne 4 shópshek súıip otyr

ShYMKENT. QazAqparat - Ońtústik Qazaqstan oblysynda soǵys ardageri Ismatýlla Bekjanov Jeńis merekesi qarsańynda 100 jasqa toldy. Saıram aýdanynda turatyn qarııa jubaıy Tursynaı áje ekeýi 8 ul súıgen. Búginde olardan 24 nemere 53 shóbere jáne 4 shópshek súıip otyr. Osylaısha urpaqtary beıbit kúnniń aspanynda baqytty ómir keship júr, dep habarlaıdy QazAqparat HAA tilshisi.

Ol Jeńis merekesin jyl saıyn aýdan ortalyǵyndaǵy alańda qarsy alatyn. Bul kúnde júrip-turýy aýyrlaǵandyqtan, bıyl óz úıinde atap ótpekshi. Qarııa sum soǵystyń qıyn kúnderin eshqashan esten shyǵarǵan emes. Maıdanǵa 22 jasynda ózi suranyp baryp, saper bolǵan. Chehoslavakııa, Rýmynııa, Ýkraına syndy Eýropa elderin jaýdan azat etýge qatysqan. Soǵysta Dnepr ózeninen ótken kezi óte qıyn bolǵanyn aıtady. Sol jerde talaı maıdandas dostarynan aıyrylypty. Osylaısha eýropa elderin jaýdan azat etip, 7 jyldan keıin aman esen elge oralǵan.

«Dnepr ózeni tereń boldy. Aǵysy da qatty. Bizdiń jaýyngerler ózenniń arǵy betine ótip jatqan tusta, jaý tutqıyldan tap berdi. Aıaq astynan urys bolyp, biz kóptegen qarýlastarymyzdan aıyrylyp qaldyq. Keıinen, soǵys 5 mamyr kúni toqtaǵynyn bildik. Sol kezde jeńiske jetkenimizdi estidik. Bul biz úshin shattyq qýanysh bolatyn»,- deıdi ardager.

Bul kúnde qarııanyń keýdesinde 2-shi dárejeli «Otan soǵysy» ordeni, «Erligi úshin» jáne «Germanııany jeńgeni úshin» medali jarqyrap tur. Bul onyń erlikpen qol jetkizgen jeńisi. 1946 jyly elge kelgen soń birden jumysqa ornalasqan. Zeınetke shyqqanǵa deıin mal dárigeri bolyp jumys istegen. Eseli eńbek baqytqa jeteleıtini bar. Ardagerdiń aq adal jumysyn eskergen Elbasy alǵys hat tabys etipti. Búginde Saıram aýdanynda jasy 100-ge jetken soǵys ardageri osy Ismatýlla qarııa ǵana eken.

«Qazir bizdiń aýdanda meniń qurdastarym qalmady,  joq dep aıtsam da bolady. Barlyǵy erte qaıtys bolyp ketti. Osy jasqa jetkenime allaǵa shúkirshilik etemin. Meniń jalǵyz armanym bar. Ol- álemde tynyshtyq bolsa eken deımin. Biz kórgen soǵysty endi eshkim kórmese deımin»,- deıdi júz jasaǵan qarııa.

Aıta keteıik, Saıram aýdanynan maıdan dalasyna 21 myń adam attanǵan eken. Soǵystan aman-esen oralǵandarynyń  búginde 19-y ǵana tiri. Solardyń qataryn tolyqtyryp júrgen  Ismatýlla aqsaqal jastardy eńbekti súıip, beıbit zamannyń qadirin bilýge úndeýde.