OQO-da Prezıdent kúnine oraı qaıyrymdylyq sharasy ótti

ASTANA. QazAqparat - Ońtústik Qazaqstan oblysynda 1 jeltoqsan - Qazaqstan Respýblıkasynyń Tuńǵysh Prezıdenti kúnine oraı oblystyq Qazaqstan halqy Assambleıasynyń uıymdastyrýymen «Qaıyrymdylyq - qaıyrly is» forýmy ótti.

Oblystyq «Qazaqstan halqy Assambleıasy» ǵımaratynda ótken ıgi sharaǵa oblystyq máslıhattyń depýtattary, kásipkerler, etnomádenı birlestikterdiń tóraǵalary men belsendi músheleri, oblystyq assambleıa janyndaǵy qurylymdardyń jetekshileri jáne óńir turǵyndary qatysty.

Qaıyrymdy jandardyń basyn qosqan sharanyń basty maqsaty kópshiliktiń demeýimen naýqas búldirshinderge kómek qolyn sozý bolyp tabylady. Jıyndy ashyp, sóz sóılegen oblystyq Qazaqstan halqy Assambleıasy tóraǵasynyń orynbasary Muratáli Qalmuratov forýmnyń mańyzyna toqtalyp, qaıyrymdylyq sharalaryn úılestirý búginde assambleıa jumysynyń basty baǵytyna aınalǵanyn aıtyp ótti.
 

Forým aıasynda oblystyq ázil-syqaq teatrynyń ártisteri «Yntymaq áýenderi» atty mýzykalyq komedııasyn kópshiliktiń nazaryna usyndy. Sonymen qatar, muqtaj jandarǵa kómektesýge qashanda ázir ekendikterin bildirgen qaıyrymdy jandar arnaıy qoıylǵan jáshikke qarjy saldy.

Іs-shara sońynda arnaıy qurylǵan komıssııanyń tóraǵasy, OQO Qazaqstan halqy Assambleıasy janyndaǵy Qoǵamdyq kelisim keńesiniń jetekshisi Orynbaı Rahmanberdıev bıletten jáne qaıyrymdylyq aktsııasynan qolma-qol 4589100 teńge jınalǵanyn, taǵy birqatar jomart jandardyń 1400000 teńgeni naýqas balalardyń jeke shotyna aýdarýǵa ýáde bergenin habarlady. Jıynda 5 balanyń ata-anasyna 500 myń teńgeden tapsyryp, qalǵan qarjy da tolyǵymen Almaty, Astana qalalaryndaǵy medıtsınalyq uıymdarda em alý úshin kezekte turǵan ońtústikqazaqstandyq balalardyń emdelýine jumsalatynyn aıtty.

Aıta ketý kerek, qaıyrymdylyq sharasyna "Shymkent qus" JShS, «Ordabasy qus» JShS, «Bal Tekstıl» JShS, «Amangeldi» JShS jáne Qazyǵurt aýdanynyń birqatar kásipkerleri belsene qatysty.

Qazaqstan halqy Assambleıasynyń 24 sessııasynda Memleket basshysy Nursultan Ábishuly Nazarbaev elimizdegi qaıyrymdylyq maqsatyndaǵy is-sharalardy úılestirýdi Qazaqstan halqy Assambleıasyna júktedi.
 

Osy baǵytta ótken jyly oblys aýmaǵynda assambleıanyń uıytqy bolýymen qaıyrymdylyq is-sharalary úılestirilip, 27 myńnan astam adamǵa jalpy - 85 mln. teńgeniń kóleminde zattaı jáne qarjylaı kómek kórsetildi. 6 naýqas búldirshinniń elimizdegi irgeli medıtsınalyq mekemelerde kezeksiz em alýyna yqpal etildi.

Bıylǵy qańtar-qyrkúıek aılarynda óńirdegi 400-ge jýyq qaıyrymdylyq is-sharalary ótkizilip, quny 30 mln. teńgeden astam kómek kórsetildi.