OQO-da onomastıka komıssııasynyń kezekti májilisi ótti
Basqosýǵa komıssııa músheleri men aýdandyq, qalalyq mádenıet jáne tilderdi damytý bólimderiniń basshylary jáne til mamandary qatysty, dep habarlaıdy QazAqparat tilshisi.
Búginde elimizde moraldyq, ıdeologııalyq turǵydan eskirgen ataýlardan arylý jáne tarıhı ataýlardy jańǵyrtý baǵytynda tıisti jumystar júrgizilýde. Osy maqsatta uıymdastyrylǵan májiliske Arys, Shymkent qalalary men Báıdibek, Qazyǵurt, Maqtaral, Otyrar, Ordabasy, Túlkibas aýdandaryndaǵy mekemeler jáne ákimshilik-aýmaqtyq birlikterdiń ataýlary qaraldy. Ondaǵy quramdas bólikterine ataý berý men ataýlaryn qaıta ózgerti jóninde túsken 133 usynys talqylandy.
Komıssııa músheleri usynystyń barlyǵyn oń qorytyndylap, zań aıasynda tıisti jumystardy jalǵastyrý jóninde sheshim qabyldady. Endi bul sheshimder jergilikti atqarýshy organdarǵa joldanady.
Qaralǵan usynystardyń ishinde mektepterdiń ataýyn ózgertý máseleleri de bar. Máselen, Arys qalasyndaǵy «MTF» shaǵyn jınaqty bastaýysh mektebi endi «Yntymaq» shaǵyn jınaqty bastaýysh mektebi, «Leshoz» shaǵyn jınaqty bastaýysh mektebi «Birlik» shaǵyn jınaqty bastaýysh mektebi, Báıdibek aýdanyndaǵy «Komsomol» jalpy orta mektebi «Qarataý» jalpy orta mektebi dep qaıta atalmaq. Tek oblystyq máslıhattan qoldaý tapqan jaǵdaıda Respýblıkalyq onomastıka komıssııasynyń qaraýyna engiziledi.
Sonymen birge, Maqtaral aýdanyndaǵy Jetisaı qalasy men Myrzakent kentindegi birshama ýaqyttan beri synǵa iligip júrgen keńestik dáýirden qalǵan Sadovyı, Mehtýpık, Kırov, Komsomol, Oktıabr, ıÝjnyı, Aptechnyı, DEÝ 300 sııaqty ataýlar joıylyp, kósheler ulttyq tanymǵa jaqyn ataýlarmen qaıta atalatyn boldy.
Eske salaıyq, oblystyq onomastıka komıssııanyń bıylǵy sáýir aıynda ótken otyrysynda osyndaı 86 usynys qaralyp, usynystar biraýyzdan maquldanǵan bolatyn.