OQO-da «Meniń óz tarıhyma qosqan úlesim» atty sýretshiler men qolóner sheberleriniń kórmesi ótti
Kórmeniń maqsaty mektep oqýshylarynyń Otandy súıýge, týǵan eline, jerine degen súıispenshiligin arttyrý, ásemdikke, eliniń murasyn jalǵastyrýshy azamat bolýǵa tárbıeleý. Kórme ortasyna qoıylǵan kóne Otyrardyń maketin qorshaı ornalasqan oqýshylar kelgen qonaqtardy ánmen qarsy aldy. Kórmege qatysýshylardy aýdan ákimi Erlan Aıtahanov quttyqtady.
«Qolóner degenimiz - kásiptiń biri de, biregeıi. Al kásipkerlik - adam balasynyń tirshilik kózi. Táýelsizdikke qol jetkizgen sátten bastap óz elin jarqyn bolashaqqa bastap kele jatqan Nursultan Nazarbaev syndy ult kóshbasshysy bar Qazaq eli az ýaqyt ishinde buryn-sońdy bolmaǵan tabystarǵa qol jetkizdi. Elbasymyzdyń «Táýelsizdikke qol jetkizgennen góri, ony ustap turý áldeqaıda qıyn. Bul - álem keńistigindegi ǵumyr keshken talaı halyqtyń basynan ótken tarıhı shyndyq. Biz ózgeniń qateliginen sabaq alýymyz kerek. Ol sabaqtyń túıini bireý ǵana - Máńgilik el bolý. Bul bizdiń óz qolymyzda», - dedi aýdan basshysy.
Kórmeni muqııat aralap, ár sheberdiń týyndysymen jete tanysqan aýdan ákimi kórme sońynda jas sheberlerdiń jetekshilerimen pikir almasty.
"Ólkemizdiń tarıhy Arystanbabpen, Otyrar qalashyǵymen ǵana bitpeıdi. Tóńiregimiz tola tarıh. 200-ge jýyq bir kezderi gúldengen qala bolǵan, búginderi tóbege aınalǵan tarıhı nasandarymyz bar. Solardyń biri ári beregeıi álem tanyǵan ál-Farabıdiń kindik qany tamǵan Oqsyz qalasy. Sizderdiń sýretterińizden, ózge de týyndylaryńyzdan osylardyń tarıhy kórinis tabýy tıis. Ol úshin talmaı izdený kerek. Uly babamyz Ábý Nasyr ál-Farabıden bólek 30-ǵa tarta Farabıler osy ólkeniń dańqyn arttyrǵan. Olar ǵylym men ónerdiń ár salasynda jańalyq ashyp, el qurmetine bólengen. Osy danalarymyz da tereń zertteýdi, nasıhattaýdy kútedi. Jıyndy paıdalanyp sizderdi osy baǵytta jumys isteýge shaqyramyn", - dedi Erlan Qýanyshuly.