OQO-da memlekettik qyzmetshiler arasynda spartakıada bastaldy

ShYMKENT. QazAqparat - Ońtústik Qazaqstan oblysynda memlekettik qyzmetshilerdiń tól merekesine jáne memlekettik qyzmet isteri organdarynyń 20 jyldyǵy mereıtoıy qarsańynda spartakıada bastaldy, dep habarlaıdy QazAqparat tilshisi.

Sporttyq sharaǵa barlyǵy 84 memlekettik organnyń 1200-ge jýyq ákimshilik qyzmetshileri men quqyq qorǵaý qyzmetiniń ókilderi qatysýda. Olar barlyǵy 15 komandany qurady. Saıysta qatysýshylar sporttyń 6 túri boıynsha baqtaryn synaıdy.

Memlekettik qyzmetshiler aldymen, voleıbol, fýtbol oınaıdy. Sosyn gir tasyn kóterip, arqan tartady. Shapshańdyqtaryn ústel tennısi men sýda júzý sportynan baıqatady.

Jarystyń ashylý saltanatynda QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń OQO boıynsha departamentiniń basshysy Álı Kómekbaev quttyqtaý sóz sóılep, qatysýshylarǵa sáttilik tiledi.

«Memlekettik qyzmet - árbir memlekettiń qalyptasýy men damýynyń basty negizi ekenin eskersek, Elbasymyz kásibı memlekettik apparat qurýdy kózdegen Ult josparyn engizgeli 3 jylǵa jýyq ýaqyt ótti. Qazirgi tańda oblysymyzda memlekettik qyzmetshilerdiń 50 paıyzǵa jýyǵynyń memlekettik qyzmettegi ótilderi 10 jyldan asady. Memlekettik qyzmetti jaýapkershilikpen atqaryp júrgen Sizderge sportta da jarqyn jeńister tileımin!»,- dedi departament basshysy Álı Amantaıuly.

Aqtyq saıystar erteń 29-shy sáýir kúni ótedi. Osy kúni jarys jeńimpazdaryna baǵaly syılyqtar men arnaıy kýbok tabys etilmek.