OQO-da mektep dırektorlaryn úreıde ustap, bopsalap kelgen jýrnalıster anyqtaldy
BAQ ókilderiniń quqyqtyq saýattylyǵy men áreketterindegi zańsyzdyqtar sóz bolǵan jıynda birqatar keleńsiz jaıttar kóterildi. Semınarda sóz alǵan jergilikti basylymnyń bas redaktory Aıgúl Qapparova ásirese jekelegen gazetter ashyp alǵan jýrnalısterdiń shekten shyǵyp bara jatqan áreketterin atap ótti.
«Búgingi kúni oblysta mektepterdi aralap, jýrnal tekseretin jýrnalıster paıda boldy. Olar mektep dırektorlaryn qorqytyp, ashanalarǵa deıin tekseretin bolǵan. Olardy bopsalap, aqsha talap etedi. Sóıtip ózderi ashyp alǵan gazetterdi bopsalaýdyń quralyna aınaldyrǵan. Buny zańsyz dep bilemin. Jýrnalıst tek aqparat alýǵa quqyly. Jýrnal talap etip, bala sanyn anyqtaıtyn, ashana tekseretin quqy joq. Ókinishke oraı bizde «prokýratýra» sózin jaza almaıtyn jýrnalıster prokýratýra men zań týraly maqalalar jazady. Sondyqtan da quqyqtyq saýat jóninde osyndaı semınarlardy kóptep ótkizýdi usynamyn», - dedi Jýrnalıster odaǵynyń ońtústiktegi fılıalynyń tóraıymy.
Al oblystyq prokýratýra ókilderi bolsa jyl basynan beri 6 BAQ-qa qatysty azamattyq is qaralǵanyn atap ótti. Azamattar negizinen jýrnalısterdiń jalǵan aqparat berý, ar-namysqa tııý sııaqty áreketterine shaǵymdanǵan. Ótken jyly osyndaı 8 derek tirkelgen. Jýyrda bir gazettiń bas redaktory alaıaqtyq jasap, kásipkerden 5 mln teńge bopsalaǵany úshin qamaýǵa alyndy. Tergeý barysynda Memlekettik kirister departamentiniń qyzmetkeri bolyp tabylatyndyǵy týraly ózine jalǵan kýálik jasap alǵany da anyqtalǵan. Oblys prokýrorynyń orynbasary Janbolat Týǵanbaevtyń aıtýynsha, bıylǵy alty aıda quzyrly organdarǵa qatysty 274 synı maqala jarııalanǵan. Onyń kópshiligi jýrnakıstik etıkaǵa saı emes.
«Jasyryn emes, búgingi kezeńde, jýrnalıster arasynda «sóz bostandyǵy» nemese «sensatsııa» degen uǵymmen ózderiniń nemese basqa tulǵanyń jeke múddesi úshin shyndyqqa janaspaıtyn aqparat taratyp, qoǵamnyń pikirin teris baǵytqa aýdarýǵa tyrysady. Jýrnalıstik quqyqtaryn teris paıdalanyp, belgili tulǵalardy qorqytý arqyly bopsalaý, qarajat talap etý derekteri úshin qylmystyq jazaǵa tartylýda. Al, Saryaǵash aýdanynda jýrnalısterdiń biri shyndyqqa janaspaıtyn maqala jarııa etkeni úshin qylmystyq jaýapkershilikke tartylyp, keıin raqymshylyq zańyna saı bosatyldy. Mundaı mysaldar kóptep kezdesedi», - dedi oblystyq prokýratýranyń bólim bastyǵy Jumaǵalı Botabekov.
Aıta keteıik, búgingi tańda oblys aýmaǵynda 255 buqaralyq aqparat quraly tirkelgen. Onyń ishinde 157 gazet, 35 jýrnal, 13 telearna, 4 radıo, 16 ınternet saıttar bar.