OQO-da Medıatsııa keńesiniń kóshpeli otyrysy ótti

ShYMKENT. QazAqparat - Ońtústik Qazaqstan oblysy Saryaǵash aýdanynda Qazaqstan halqy Assambleıasy  janyndaǵy Medıatsııa keńesiniń kóshpeli otyrysy ótti.  «Medıatsııa ınstıtýtyn damytý jáne jańa ádisterdi engizý» taqyrybynda ótken jıynǵa oblystyq «Qoǵamdyq kelisim» KMM basshysy Erbol Baıqonaqov pen aýdandyq sottyń sýdıalary, prokýratýra men ishki ister bóliminiń ókilderi qatysty, dep habarlaıdy QazAqparat tilshisi.

Jıynǵa kásibı jáne kásibı emes medıatorlar, aýdan, aýyl ákimdikteriniń medıatsııa salasyna jaýapty qyzmetkerleri de arnaıy shaqyryldy. Basqosýda sóz alǵan oblystyq «Qoǵamdyq kelisim» KMM janyndaǵy medıatsııa kabınetiniń meńgerýshisi Hasan Batsıev óńirimizde medıatsııa jelisin damytý baǵytynda atqarylyp jatqan jumystarǵa toqtaldy.

 

«Elbasy Qazaqstan halqy Assambleıasynyń XXIV sessııasynda medıatsııa jelisin damytýdy assambleıaǵa júktegen bolatyn. Bul baǵytta Ońtústik Qazaqstan oblystyq «Qoǵamdyq kelisim» mekemesinde ashylǵan medıatsııa kabınetinde 600-ge jýyq azamatqa quqyqtyq kómek kórsetildi. Oblystaǵy 4 medıatsııa ortalyǵymen áriptestik baılanys ornatyp, óńirde qyzmet atqaratyn 44 kásibı, 546 kásibı emes medıatorlardyń derekqory túzildi. Óńirdegi medıatorlardyń yqpalymen byltyrǵy jyly 4 myńnan astam is boıynsha taraptar ortaq mámilege kelse, bıylǵy jyldyń 8 aıynda 3207 is sotqa deıingi tártippen sheshildi», - dedi Hasan Batsıev.

 

Keńeste Saryaǵash aýdandyq sotynyń sýdıasy men «Medıatsııa jáne quqyq» ortalyǵynyń basshysy, kásbiı medıator Elmıra Esımbetova, sondaı-aq kásibı emes medıator Jahan Beısenbekov pen Derbisek aýyldyq okrýginiń ákimi sóz sóıledi. Jıynǵa qatysýshylar daýlasýshy taraptardy bitimgershilikke bastaıtyn medıatsııa ınstıtýtyn damytý jaıly oı-pikirlerin ortaǵa saldy.  Oblystyq «Qoǵamdyq kelisim» KMM basshysy Erbol Baıqonaqov keńesti qorytyndylap, otyrysta aıtylǵan usynys-pikirlerdiń barlyǵy eskeriletinin atap ótti.