OQO-da «Máńgilik el» patrıottyq ánder baıqaýy ótti

ShYMKENT. QazAqparat - Ońtústik Qazaqstan oblysynda «Rýhanı jańǵyrý» baǵdarlamasy aıasynda «Máńgilik el» patrıottyq ánder baıqaýy ótti. Óner saıysynda 28 kompozıtordyń Astana týraly jáne patrıottyq ánderi oryndaldy, dep habarlaıdy QazAqparat tilshisi.   

Oblystyq mádenıet jáne tilderdi damytý basqarmasy men mádenıet jáne halyq shyǵarmashylyǵy ortalyǵy uıymdastyrǵan shara jastardyń Otanǵa degen súıispenshiligin oıatyp, patrıottyq ánderdi nasıhattaý maqsatynda ótti. Sondaı-aq óńirden shyqqan kompozıtorlardyń patrıottyq ánderin, onyń ishinde patrıottyq taqyryptaǵy týyndylaryn halyq arasynda keńinen dáriptep, kompozıtor men oryndaýshy arasyndaǵy shyǵarmashylyq baılanysty damytý maqsatynda uıymdastyryldy. Óner dodasynda qazylar alqasy úmitkerlerdiń oryndaý sheberligine, daýys dıapazonyna jáne ánniń baıqaý shartyna sáıkestigine mán berdi. Mýzykalyq óńdeýi men án mátininiń mazmundylyǵyna, oryndaýshylardyń sahna mádenıeti men kıim úlgilerine de kóńil bólindi. Sonymen qatar múmkindiginshe buryn oryndalmaǵan jańa ánge nazar aýdardy.
 

Baıqaý qorytyndysy boıynsha kompozıtorlar arasynan bas júldege Shymkent qalasynan Іzbasar Keńesov, al ánshiler arasynan «Saryn» toby laıyq dep tanyldy. Júldeli birinshi oryndy Túlkibas aýdanynyń kompozıtory Rysty Shymyrbaeva jáne shymkenttik «Farab» dýeti ıelendi. Sondaı-aq, qatysýshylarǵa oblystyq mádenıet jáne tilderdi damytý basqarmasynyń arnaıy júldesi berildi. Erekshi óner kórsetkender «Eń úzdik mýzykalyq óńdeý» jáne «Eń jas ánshi», «Kórermen kózaıymy», «Patrıottyq ándi úzdik oryndaýshy», «Máńgilik el» nomınatsııalarymen marapattaldy. Barsha jeńimpazdar men nomınatsııa ıegerleri arnaıy alǵys hat pen qarjylaı syılyqtarǵa ıe boldy.