OQO-da «Maksımým» aımaqtyq ınvestıtsııalyq ortalyǵy 12 myń adamdy jumyspen qamtydy

ASTANA. QazAqparat - OQO ákimdiginiń qoldaýymen qurylǵan «Maksımým» aımaqtyq ınvestıtsııalyq ortalyǵy tarapynan 2009-2016 jyldar aralyǵynda 13 myń joba qarjylandyryldy. Nátıjesinde 12 myńnan astam azamat jumysqa ornalasty, dep habarlaıdy oblys ákiminiń baspasóz qyzmeti.

Seriktestik qarjylandyrýdyń birneshe baǵyty boıynsha jumys júrgizedi. Atap aıtqanda, mal bordaqylaý alańdaryn qurý, ındýstrııalandyrý kartasyna engen jobalardy júzege asyrý, jylyjaı sharýashylyǵyn damytý, aýyl sharýashylyǵy ónimderin qaıta óńdeý, áleýmettik mańyzy joǵary jobalardy qoldaý, kóktemgi egin egý, jınaý jumystaryn uıymdastyrý.

Osy baǵyttar boıynsha, shyǵynyn ótep, óz paıdasyna jumys jasap otyrǵan sharýaqojalyqtyń biri, Saryaǵash aýdanynyń Jemisti eldi mekeninde ornalasqan respýblıka sharýashylyqtary úshin elıtalyq jemis-jıdektermen men júzim kóshetterin ósirýmen aınalysatyn «Saryaǵash jer syıy» JShS. Atalmysh sharýa qojalyǵy ortalyqtan 15 mln teńge nesıe alyp,  syıymdylyǵy - 240 tonnany quraıtyn ónim saqtaý qoımasyn salǵan. Odan bólek, Koreıadan arnaıy kúndigine 3 gektar jerge qajet dándi egetin kóshet otyrǵyzý qurylǵysyn alǵan. Atap ótý kerek, búginde sharýaqojalyq 13 jergilikti turǵyndy jumyspen qamtyp otyr.

Sonymen qatar, «Maksımým» AIO-nan qarjy kózin alǵan kásiporyndardyń biri «Kelesgıdrostroı» JShS-nyń «Rysjan» sý elektr stansasy. Atalmysh jobanyń jalpy quny - 156 mln. 55 myń teńgeni quraıdy. Búginde «Rysjan» SES táýlik boıy jumys jasap, ortasha eseppen táýligine 16-26 myń KV.t elektr qýatyn óndiredi. Osy kúnde atalǵan stansada 12 jergilikti turǵyn jumys jasaýda.

Aıta ketý kerek, «Maksımým» qarjy ortalyǵy ashylǵaly beri Saryaǵash aýdanynda 2 707,4 mln teńgeniń 1 053 jobasy qarjylandyrylǵan. Búginde bul ortalyq óz kásibin ashamyn deýshilerge zor múmkindik syılap otyr.