OQO-da kásipker aýylǵa eńseli qaqpa ornatyp berdi
Bıylǵy jyly qurylǵanyna 80 jyl tolyp otyrǵan aýylǵa kásipker osyndaı tartýyn jasady. Atalǵan qaqpany ornatýǵa ol 12 mln teńge jumsapty.
Jańa qaqpanyń saltanatty ashylý rásimine jergilikti bılik ókilderi men aýyl turǵyndary qatysyp, quttyqtaý sóz sóıledi. Jıynda aýdan ákimi Qaırat Ábdýalıev Darbaza aýyldyq okrýginde jasalyp jatqan jumystarǵa toqtalyp ótti.
«Eldi mekendi kógildir otynmen qamtý maqsatynda 394 mln teńge bólinip, merdiger mekeme tıisi jumystardy atqarýda. Sondaı-aq aýyldyń ishki kóshelerin kúrdeli jóndeý, aıaq joldar salý jumystary bastaý alyp, aıaq joldar salynyp jatyr. Oǵan qosa aýyldyq okrýgtegi Batyr analar alleıasy men aýyl ákimi apparatynyń ǵımaraty men mádenıet úıi kúrdeli jóndeýden ótýde. Bul memlekettiń shalǵaı jatqan eldi mekenderdi damytý maqsatynda qolǵa alynǵan jobalarynyń biri sanalady. Sondaı-aq, aýyl turǵyndaryn medıtsınalyq kórikten ótkizýge oblystan, aýdannan arnaıy mamandar shaqyrylyp, halyqtyń densaýlyǵyn tekserip, qajetti keńesterin berip jatyr. Bul bastama ózge aýyldarda da jalǵasyn tabady dep josparlanyp otyr», - dedi aýdan ákimi Qaırat Ábdýálıev.