OQO-da ıran halqynyń ádebıeti aptalyǵy ótýde

ShYMKENT. QazAqparat - Ońtústik Qazaqstan oblysynda ıran halqynyń ádebıeti aptalyǵy ótýde. Oblys ortalyǵyndaǵy A.S. Pýshkın atyndaǵy oblystyq ámbebap ǵylymı kitaphanasynda bolyp  jatqan sharaǵa ıran etnomádenı birlestigi men kitaphana ujymy muryndyq bolyp otyr, dep habarlaıdy QazAqparat tilshisi.

Іs-sharanyń ashylýyna Qazaqstandaǵy Iran Islam Respýblıkasy elshisiniń keńesshisi Masýd Sheıh Zeıneddın, oblystyq ıran etnomádenı birlestiginiń músheleri, kitaphana oqyrmandary men jastar qatysty.

Jıynda sóz alǵan oblystyq ıran etnomádenı birlestiginiń tóraǵasy Nurysbek Kapar-Pýr mundaı sharalar eki el arasyndaǵy rýhanı-mádenı yqpaldystyqty arttyryp, dostyqty nyǵaıtatynyn aıtty.

Al, elimizde barlyq etnostardyń tilin, mádenıetin, salt-dástúrin saqtap, nyǵaıtýǵa mol múmkindik jasalǵanynyna rızashylyǵyn bildirgen Iran elshiliginiń qyzmetkeri Masýd Sheıh Zeıneddın kitaphanaǵa elshilik atynan «Shahnama» dastanynyń qazaq tilindegi aýdarmasyn tartý etti. Kitaphana basshylyǵy qonaqqa Shymkent qalasynyń tarıhy men búgingi jetistiginen syr shertetin kitap syılady.

 Atalǵan aptalyq aıasynda parsy aqyn-jazýshylarynyń shyǵarmalary, álem ádebıetiniń klassıgi Fırdoýsıdiń «Shahnamasy» men osy shyǵarma jelisi boıynsha salynǵan ıllıýstratıvti sýretter kórmesi kópshiliktiń nazaryna usynylmaq.

Aıta ketý kerek, A.S.Pýshkın atyndaǵy oblystyq ámbebap ǵylymı kitaphanasynda óńirimizdegi etnostardyń shyǵarmalaryna arnalǵan burysh ornatylǵan. Al, parsy halqynyń ádebı týyndylary kórmesimen óńir turǵyndary qazan aıynyń sońyna deıin tanysyp, tamashalaı alady.