OQO-da ındýstrııalandyrý kartasy aıasynda 18 joba iske qosylǵan

ShYMKENT. QazAqparat  - Búgin Ońtústik Qazaqstan oblysynyń ákimi Janseıit Túımebaev ótken jyldy qorytyndylap, halyq aldynda esep berýde. Onda aımaq basshysy 2017 jyly óńirdiń ekonomıkalyq jáne áleýmettik salalarynda atqarylǵan jumystarǵa toqtalyp, aldaǵy jylda iske asyrylatyn jumys josparlary týraly baıandady, dep habarlaıdy QazAqparat tilshisi.

Esepti kezdesýge jergilikti turǵyndarmen qatar, pen QR Prezıdenti Ákimshiliginiń Memlekettik ınspektory Murat Imandosov jáne «Nur Otan» partııasynyń hatshysy Ǵabıdolla Ábdirahymov qatysty.

Ótken jyly atqarylǵan jumystarǵa toqtalǵan óńir basshysy ónerkásip salasynda 858,5 mlrd teńgeniń ónimi óndirilip, aldyńǵy jylmen salystyrǵanda 69,5 mlrd  teńgege óskenin aıtty. Ákimniń sózinshe, óńdeý ónerkásibi óndirisiniń ósimi ótken jylmen salystyrǵanda birqatar salalarda artqan. Ótken  jyly Indýstrııalandyrý kartasy aıasynda 36,4 mlrd teńgege 18 joba iske qosylǵan. Osynyń arqasynda  myńǵa jýyq jumys orny ashyldy. Al, qazirgi tańda 11 ındýstrııaldyq aımaqtyń  9-y tolyqqandy jumysqa kóshken.

«Elbasy bıylǵy Qazaqstan halqyna arnaǵan «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri atty» Joldaýynda ındýstrııalandyrý jańa tehnologııalardy engizýdiń kóshbasshysyna aınalýy tıis dep atap kórsetti. Osy oraıda oblystaǵy ónerkásiptik kásiporyndar álemdegi jetekshi óndirýshilerdiń jańa tsıfrlyq tehnologııalary men avtomattandyrylǵan basqarý júıelerin keńinen engizýdi josparlap otyr. Indýstrııalandyrý kartasy aıasynda  40 mlrd. teńgege 1500-den astam jumys ornyn quraıtyn   20 jobany iske asyrý josparlanýda»,- dedi Janseıit Túımebaev.

Oblys basshysy sondaı-aq aımaqtarda iske asyrylǵan jobalar sany 78-ge jetip, 35,9 mlrd teńge ınvestıtsııa tartylǵanyn atap ótti. Oblys ekonomıkasyna 482 mlrd teńge ınvestıtsııa baǵyttalyp, 20,2paıyzǵa artyp otyr. Bul kórsetkishpen ońtústik óńiri respýblıkada aldyńǵy orynǵa turaqtaǵan.

«Shetel ınvestorlarymen 40-tan asa iskerlik kezdes ótkizilgen. Nátıjesinde, Reseımen shaǵyn gıdroelektrstantsııasynyń qurylysyn salý jóninde kelisim jasaldy. Al, Qytaımen - bıoetanol men fosfor tyńaıtqyshy zaýyty, kún sáýlesinen elektr qýatyn óndiretin elektrstansa qurylystaryn  júrgizý kózdelip otyr»,- dedi aımaq basshysy.