OQO-da halyqtyń 95,5 paıyzy gazben qamtylady
Atalǵan meje 2017-2021 jyldarǵa arnalǵan oblystyń eldi mekenderin gazdandyrýdyń jospary negizinde júzege asady. Bul týraly oblys ákimdiginde ótken kezekti májiliste oblystyq energetıka jáne turǵyn úı-kommýnaldyq sharýashylyǵy basqarmasynyń basshysy málim etti.
«Jalpy oblys halqy jylyna 1,1 mlrd.m3 tabıǵı gaz tutynady. Onyń 840 mln.m3 qys maýsymynda, al 293 mln.m3 jaz maýsymynda. Bizdiń óńir tabıǵı gazben 3 baǵyt arqyly qamtamasyz etiledi. Olar: Ózbekstan Respýblıkasynyń «Gazlı-Shymkent» jáne «BGR-TBA» magıstraldy gaz qubyrlary, otandyq «Beıneý-Bozaı-Aqbulaq» magıstraldy gaz qubyry, Túrkmenstan Respýblıkasynyń «Qazaqstan-Qytaı» tranzıttik magıstraldy gaz qubyrlary», - dedi Marǵulan Zulharnaıuly.
Odan bólek, basqarma basshysy Shymkent qalasy aýmaǵynda 509 nysan gaz qubyrlaryn qorǵaý aımaǵy shegin buzyp ornalasqandyǵyn jetkizdi. Bul óz kezeginde sol mańda ornalasqan ǵımarattar men turǵyndardyń ómirine eleýli qaýip týǵyzyp otyr.
Májiliste sóz alǵan oblys ákimi eń birinshi kezekte jylytý maýsymyna daıyndyq jumystaryn taǵy da pysyqtap, tótenshe jaǵdaılardyń oryn almaýyna mán berýdi júktedi.
«Shymkent qalasyn qysqy maýsymǵa daıyndyq jumystaryn tolyq qadaǵalaýda ustaý kerek. Sondaı-aq, tótenshe jaǵdaılardy aldyn alýǵa mán bergen jón. Ózderińizge málim, bıylǵy jyly 8 qańtarda gaz júıesi aqaýynan jarylys bolǵanyn. Al endi qys aldymyzda kele jatyr, osyǵan oraı basqarma jáne ákimshilik birlesip avtomatty jylytý júıeleri ornatylǵan turǵyn úılerge túgendeý jumysyn júrgizsin. Ekinshiden, gaz quraldarynyń qaýipsizdigin tekseretin tehnıkalyq ınspektsııa qurylýy tıis»,-dedi ákim.
Halyqtyń qaýipsizdigi basty nazarda bolý kerek ekenin aıtqan aımaq basshysy árbir basshy óz fýnktsıonaldy qyzmetterin durys atqarý talap etiletinin jetkizdi.
Odan bólek, ákim Saryaǵash, Maqtaral, Tólebı aýdandarynda birqatar mektepterdiń jylý júıesi gazǵa aýyspaǵanyn aıtyp. Bul boıynsha aýdan, qala ákimdikterinde arnaıy komıssııa qurylyp, jumystyń oryndalýyn baqylaýdy tapsyrdy.
Aıta keteıik, oblysta jylý berý maýsymyna daıyndyq jumystary sáýir aıynan bastalǵan. Aýdan, qala ákimdikteri men oblystyq basqarmalardyń málimetine sáıkes, barlyq daıyndyq jumystary 100 paıyz oryndalyp otyr.
Kómir baǵasyn turaqtandyrý boıynsha basqarma tarapynan kómir jetkizýshi mekemelermen kelissózder júrgizilgen. Nátıjesinde satylý baǵasyn Maıkóbe kómiriniń 1 tonnasyn 12500 teńgege, al Shubarkól kómirin 13 myń teńgege deıin tómendetýge qol jetkizilip otyr.