OQO-da Eıfel munarasy boı kóterdi

ShYMKENT. QazAqparat - Memleket basshysy Nursultan Nazarbaevtyń «Bolashaqqa baǵdar: rýhanı jańǵyrý» atty maqalasynda týǵan jerdi túletý árbir azamattyń paryzy ekendigi aıtylǵan bolatyn. Osy baǵytta Ońtústik Qazaqstan oblysy, Otyrar aýdanynda aýyl mádenıetin kóterý men halyqtyń áleýetin arttyrý sharalary júrgizilýde, dep habarlaıdy «QazAqparat HAA tilshisi.

Sháýildir aýylynyń týmasy, aýdandyq máslıhat depýtaty ári jeke kásipker Aralbaı Dúısenbaıuly óz qarajatyna «Keremet» demalys keshenin saldy. Keshen qaqpasynyń aldynan áıgili "Eıfel munarasy" boı kótergen. Onyń bıiktigi 15 metrdeı bolady. Alystan kózge túsetin munara endi aýyl kórkine ajar beretin bolady.

Al, jańadan ashylǵan nysanda aýdan kásipkerleriniń buıymdary men ónimderi kópshilikke usynylmaqshy. Keshenniń ashylý saltanatyna qatysqan Otyrar aýdanynyń ákimi Erlan Aıtahanov bul nysannyń kásipkerlik salasyn órkendetýge úles qosatynyn atap ótti. Sondaı-aq «Parasat» ordeniniń ıegeri, halyq aqyny Áselhan Qalybekova jyrdan shashý shashty.