OQO-da destrýktıvti dinı aǵym múshelerine qatysty qylmystyq is qozǵaldy
Sýdıanyń sózinshe, qylmystyq toptyń úsh múshesine dinı alaýyzdyqty qozdyrý degen aıyp taǵylyp otyr.
«Kúdiktilerdiń ishinde Júsipbekov pen Borashovqa qatysty Qylmystyq kodekstiń 174-babynyń 1-bóligi «Jarııa túrde nemese aqparat quraldary arqyly dinı arazdyqty qozdyrý» boıynsha is qozǵaldy. Al úshinshi kúdikti Іztileýov Qylmystyq kodekstiń 174-babynyń 1 jáne 2-bóligimen «Aldyn ala sóz baılasý arqyly dinı alaýyzdyqty qozdyrý», 256-baptyń 1-bóligi «Terrorızmdi nasıhattaý nemese terrorızm aktisin jasaýǵa jarııa túrde shaqyrý» boıynsha aıyp taǵyldy. Olardyń qylmystarynyń ekstremızmge qatysty bolýyna baılanysty qamaýǵa alý týraly sanktsııa berildi», - dedi Ǵanı Baıarystan.
Qazir ustalǵan top múshelerine qatysty sotqa deıingi tergeý amaldaryn oblystyq ishki ister departamentiniń tergeý basqarmasy qyzmetkerleri júrgizip jatyr. Tergeý qupııalylyǵyna baılanysty quzyrly organ ókilderi qandaı da bir aqparat bermedi.
Eske salaıyq, 19 qyrkúıek kúni Shymkent qalasynyń «Garant» dúkenderi aýmaǵynda OQO ІІD jáne OQO UQK qyzmetkerleri birlese otyryp, destrýktıvti dinı aǵymdarynyń ustanýshylarynan quralǵan qylmystyq topty quryqtaý boıynsha arnaıy operatsııa júrgizgen bolatyn. Arnaıy jasaq sarbazdary ustaǵan top múshelerine mobıldi qurylǵylardyń ıdentıfıkatsııalyq kodyn ózgertip, oǵan ekstremıstik sıpattaǵy aqparattardy jazýmen jáne satýmen aınalysqan degen aıyp taǵylǵan edi. Qazirgi ýaqytta ustalǵandarǵa qatysty sotqa deıingi tergeý amaldary júrgizilip jatyr.