OQO-da densaýlyq saqtaý basqarmasyna jańa basshy taǵaıyndaldy

ASTANA. QazAqparat - Búgin Ońtústik Qazaqstan oblysy ákiminiń ókimimen QR Densaýlyq saqtaý jáne áleýmettik damý mınıstriniń kelisimi boıynsha Ońtústik Qazaqstan oblysy densaýlyq saqtaý basqarmasynyń basshysy laýazymyna Muqan Egizbaev taǵaıyndaldy. Bul týraly oblys ákiminiń baspasóz qyzmeti habarlady.

Jańa basshyny tanystyrǵan oblys ákimi J.Túımebaev biliktiligi joǵary jáne medıtsına ǵylymdarynyń doktory Muqan Keńesbekulyna aldaǵy jumysyna sáttilik tilep, densaýlyq saqtaý salasynyń damýy boıynsha birqatar naqty tapsyrmalar retin mindettedi.

«Eń bastysy, halyqqa medıtsınalyq kómektiń ýaqytyly jáne sapaly kórsetilý qyzmetin qamtamasyz etý. Sondaı-aq, ana men bala ólimin azaıtý baǵytyndaǵy jumystardy jetildirip, balanyń damý deńgeıin arttyrýdy qolǵa alý kerek. Sonymen qatar, densaýlyq saqtaý salasyn damytýdyń 2016-2019 jyldarǵa arnalǵan «Densaýlyq» memlekettik baǵdarlamasynyń óńirde sapaly ári tıisti merziminde oryndalýy qajet», - dedi ákim.  

Muqan Keńesbekuly 1962 jyly dúnıege bilimi joǵary, mamandyǵy pedıatr-dáriger, ekonomıst, joǵary sanatty densaýlyq saqtaýdy uıymdastyrýshy, medıtsına ǵylymdarynyń doktory.

Eńbek jolyn 1987 jyly Shymkent qalalyq balalar juqpaly aýrýlar aýrýhanasynyń dáriger-ordınatory bolyp bastaǵan.

Al 1988-2008 jyldary Shymkent qalalyq balalar juqpaly aýrýlar aýrýhanasynyń bólim meńgerýshisi, bas dárigeri, oblystyq dermatovenerologııalyq dıspanseriniń bas dárigeri, oblystyq balalar aýrýhanasynyń bas dárigeri qyzmetterin atqarǵan.

2008 jylǵy qyrkúıek aıynan bastap oblystyq klınıkalyq aýrýhanasynyń bas dárigeri bolyp eńbek etip keledi.