OQO-da tsıfrlyq tehnologııanyń arqasynda qus eti 5 esege kóp óndirildi
Máselen, oblysta zamanaýı tehnologııalar egin sharýashylyǵy men mal sharýashylyǵynda endirilip, onyń jemisin búginde aýyl sharýashylyǵy mamandary kórip keledi. Búginde baǵbandar ozyq tehnologııanyń nátıjesinde 2,8 myń gektar jerge egilgen qarqyndy baýdyń ónimdiligi, dástúrli tásilmen egilgen 29 myń gektar baýdyń ónimdiligine qaraǵanda 1,5 - 2 esege artqanyna kóz jetkizdi. Bul keshegi Elbasy Joldaýynyń úshinshi baǵytynda aıtylǵan «Aqyldy tehnologııalar» - agroónerkásip keshenin qarqyndy damytý tapsyrmasyna saıady.
Al óńirdegi jylyjaılardyń 70 gektary avtomattandyrylǵan. Osynyń arqasynda 1 gektarǵa shaqqandaǵy ónimdilik bir jylda 200 tonnadan astam qııar men 400 tonnaǵa jýyq qyzanaqty qurady. Jalpy 2017 jyly oblys boıynsha jylyjaılardyń kólemi 2016 jylmen salystyrǵanda 18 paıyzǵa artyp, 1 325 gektardy qurady. Sonymen qatar tamshylatyp sýarý 16 paıyzǵa artyp, 59,1 myń gektardy qurady.
Budan bólek, mal sharýashylyǵynda barlyq mal basynyń esebi avtomattandyrylyp otyr. Bul shara maldardyń qozǵalysyn jáne barlyq veterınarlyq is-sharalardy turaqty baqylaýǵa múmkindik beredi. Sonymen qatar oblystaǵy mal sharýashylyǵy ónimin óndirý men óńdeýde jańa tehnologııalar belsendi túrde qoldanýda. Mysaly, sút óndirisin damytýmen aınalysatyn «Bórte-Mılka» sút taýarly fermasy sıyrdy saýýdan bastap azyqtandyrý jáne sútti saqtaýǵa deıingi protsesti avtomattandyrylǵan júıe arqyly atqarady. Óndiristi avtomattandyrý nátıjesinde kásiporynda bir sıyrdan jylyna 7 myń lıtrge deıin sút alynady, al dástúrli tásilmen ónimdilik 3 myń lıtrdi quraıdy.
Sonymen birge oblystaǵy 2,7 mln bas qustyń 1,2 mıllıony zamanaýı avtomattandyrylǵan qus fermalarynda («Shymkent qus», «Ordabasy qus») ósiriledi. Onda taýyqtardy qorektendirý, jumyrtqa jınaý, soıý, daıyn ónimdi saqtaý men sanıtarlyq jumystardyń barlyǵy avtomattandyrylǵan júıe arqyly iske asyrylady. Tsıfrlyq tehnologııany qoldanýdyń nátıjesinde qus etin óndirý 5 esege deıin artty.
Al eýropalyq standartarǵa sáıkes keletin «SPK Hamıt» 2,7 myń tonna óńdelgen balyq ónimderin shyǵarsa, «Aq sanat ınjınırıng» 1 myń tonna tiri balyq ósirdi. Bul kásiporyndardyń ónimderi Eýropa memleketterine eksporttalady.