OQO-da bos jatqan jerlerdi memleketke qaıtarylýda
Aýdan, qala ákimderiniń salalyq orynbasarlary men jer qatynastary salasyna jaýapty bólim basshylarynyń qatysýymen ótken jıynda jer qatynastaryn damytý máseleleri sóz boldy. Oblystyq jer qatynastary basqarmasynyń bólim basshysy Qarsybek Ertýov aǵymdaǵy jyldyń sońyna deıin oblys boıynsha 106 131 jer paıdalanýshynyń aýyl sharýashylyǵy maqsatyndaǵy jerlerine jáne 842 eldi mekenniń 811,8 myń ga jerine qujattamalyq revızııa jumystaryn júrgizý jáne aýdan, qala ákimdikterimen jaıylymdardy basqarý, olardy paıdalaný jónindegi jospardy jergilikti ókildi organdarmen bekitý jumystary júrgizilip jatqanyn atap ótti.
Bul baǵytta birqatar aýdan, qala ákimdikteri tarapynan atqarylmaı otyrǵan jumystarǵa toqtaldy. Onyń sózinshe bıylǵy jyly óńirde 467 jer paıdalanýshynyń 63,8 myń ga paıdalanylmaı jatqan aýyl sharýashylyǵy maqsatyndaǵy jer ýchaskeleri memleket menshigine qaıtarylǵan. Sonymen qatar oblys aýmaǵyndaǵy qubyrlardyń qorǵaý jáne qaýipsizdik aımaqtary shegindegi jer ýchaskelerin paıdalaný máseleleri boıynsha is-sharalar josparynyń oryndalýy barysyna taldaý jasalyp, birqatar aýdan, qala ákimdikterimen atqarylýy tıis jumystar atqarylǵan.
Óz kezeginde oblys ákiminiń orynbasary Erbol Sadyr barlyq aýdan, qala ákimdikterine jer qoryna qujattamalyq revızııa júrgizý, aýyl sharýashylyǵy jerlerine túgendeý jumystaryn jalǵastyrý jáne qubyrlardyń qorǵaý aımaqtaryna túsken qurylystardy kóshirý boıynsha naqty tapsyrmalar berdi.