OQO-da bıyl jalpy quny 70 mlrd teńgeni quraıtyn 20 joba iske asady
Búgin bul týraly Óńirlik kommýnıkatsııalar qyzmetinde ótken baspasóz máslıhatynda «Shymkent» ÁKK UK» basqarma tóraǵasy Aıtmuhammed Aldajarov málim etti, dep habarlaıdy QazAqparat tilshisi.
Basqarma tóraǵasynyń aıtýynsha, osy jobalar arqyly 2600-ge jýyq adam jumyspen qamtylatyn bolady. Barlyǵy «Ońtústik» ındýstrıaldy aımaq jáne «Ońtústik» arnaıy ekonomıkalyq aımaǵynda iske asyrylmaq.
«Bıylǵy jyly qolǵa alynatyn 20 jobanyń 12-sin «Shymkent» áleýmettik-kásipkerlik korporatsııasy júzege asyrady. Al, «Ońtústik» arnaıy ekonomıkalyq aımaǵy jalpy quny 3,5 mlrd teńgelik 5 jobany iske asyrýdy josparlaýda. Budan bólek, «Ońtústik» ındýstrıaldy aımaq 40 mlrd teńgeni quraıtyn 5 jobany iske qosý maqsatyn kózdep otyr», - dedi Aıtmuhammed Turarbekuly.
Ótken jyly «Shymkent» ÁKK transformatsııalaý kezeńinen ótken. Nátıjesinde jańa jumys ádisi ázirlenip, ınvestıtsııalyq jobalardy tıimdi basqarýǵa jáne iske asyrýǵa baǵyttalǵan basqarý júıesi engizilgen. Osynyń arqasynda birqatar aýqymdy jobalardy iske asyrý isi jeńildeı tústi. Máselen, Qarabulaq aýylynda sút óndirý jáne qaıta óńdeý klasteri quryldy. Sondaı-aq, «Astana» turǵyn úı keshenin salý boıynsha otandyq ınvestorlar 1 mlrd 507 mln teńge qarjy quıǵan bolatyn. Búginde 4 blok turǵyn úı kesheniniń 2-eýi el ıgiligine tapsyrylǵan.
Aıta keteıik, búginde oblysta ınvestıtsııalyq jobalardyń sany men sapasyn arttyrý maqsatynda «Shymkent» ÁKK-nyń «Ontustik Invest» ınvestorlarǵa qyzmet kórsetý bólimi qaltqysyz jumys isteýde. Ondaǵy mamandar bıznes-jobamen keletin ınvestorlarǵa tıisti deńgeıde kómek qolyn sozyp keledi. Sondaı-aq, atalǵan mekeme qurylys, agroónerkásiptik keshen, jer qoınaýyn paıdalaný, energetıka, memlekettik - jekeshelik áriptestik jáne «Smart Ontustik» aqparattyq tehnologııalaryn engizýge atsalysyp otyr.