OQO-da basqarma basshysy quzyretine jatpaıtyn qyzmeti úshin para alǵan

ASTANA. QazAqparat - Ońtústik Qazaqstan oblysynda ádilet basqarmasynyń basshysy quzyretine jatpaıtyn qyzmet túrin kórsetkeni úshin para alǵan.  Bul týraly búgin QR Ádilet mınıstrliginiń alqa otyrysynda vedomstvonyń jaýapty hatshysy Danııar Aıtmuhametov  aıtty, dep habarlaıdy QazAqparat.

Onyń aıtýynsha, Ádilet mınıstrligi tarabynan jemqorlyqtyń aldyn alýǵa baǵyttalǵan sharalardyń júzege asyrylyp jatqanyna qaramastan, aýmaqtyq ádilet organdarynyń qyzmetinde jemqorlyq faktileri kezdesedi.

«Máselen, OQO Saıram aýdandyq ádilet basqarmasynyń basshysy Qoǵamdyq densaýlyq saqtaý basqarmasynyń basshysymen ymyralasap,  jeke kásipkerden qoǵamdyq tamaqtaný ornyn ashýǵa oń qorytyndy bergeni úshin para alǵan. Aıta keterligi, mundaı qyzmet ádilet organdarynyń quzyretine jatpaıdy», - dedi jaýapty hatshy.

Onyń sózine qaraǵanda, Ádilet mınıstrliginiń árbir aýmaqtyq organynda ishki qaýipsizdik qyzmeti bar. Olardyń basty mindetteri jemqorlyqtyń aldyn alyp, ádep  normalarynyń oryndalýyn qadalaǵaý bolyp sanalady.

«Degenmen, tájirıbe bul qyzmetkerlerdiń óz mindetterin nemquraıly oryndaıtyndyǵyn kórsetti. Olardyń jumystary basshylyqtyń tapsyrmasy negizde qyzmettik tekserý júrgizýmen ǵana shektelip otyr», - dedi  Danııar  Aıtmuhametov.

Jaýapty hatshy deregine sáıkes, 2017 jyly ádilet organdarynyń 11 qyzmetkeri sottalǵan.