OQO-da Assambleıa músheleri jastarmen kezdesti

ShYMKENT. QazAqparat - Ońtústik Qazaqstan oblysynda Qazaqstan halqy Assambleıasynyń músheleri Maqtaral aýdanynyń jastarymen kezdesti. Aýdandyq mádenıet úıinde ótken jıynǵa oblystyq Qazaqstan halqy Assambleıasy tóraǵasynyń orynbasary Muratáli Qalmuratov pen aýdan ákiminiń orynbasary Maqsat Joldasbekov jáne jastary qatysty, dep habarlaıdy QazAqparat tilshisi.

Erkin formatta ótken jıynǵa aýdandyq prokýratýranyń qyzmetkerleri men aýdandyq Qoǵamdyq kelisim keńesiniń tóraǵasy, aýdan ákimdigine qarasty bólimderdiń basshylary men etnomádenı birlestikter janyndaǵy jastar qanattarynyń músheleri de shaqyryldy. Basqosýda Elbasynyń «Bolashaqqa baǵdar: rýhanı jańǵyrý» maqalasyn nasıhattaý jáne túsindirý, sonymen birge ony júzege asyrý, qazirgi jahandyq ózgerister jaǵdaıynda sanany jańǵyrtý jaıy keńinen sóz boldy.

 

«Turaqtylyq pen damý, tatýlyq pen dostyq - bárimizge ortaq qasterli qundylyqtar ári táýelsizdigimizdiń basty tiregi. Elimizde júrgizilgen salıqaly saıasattyń arqasynda birligi jarasqan, berekeli elde ǵumyr keship jatyrmyz. Tynyshtyǵy buzylǵan elderde ne bolyp jatqanyn ózderińiz bilip otyrsyzdar. Ǵasyrlar boıy qol jetkizgen jetistikteri áp-sátte kúl-talqan bolyp, qanshama adamdar opat bolýda. Sondyqtan, birtutas halyq bolyp, berekeli ǵumyr keshýdiń úlken baqyt ekenin umytpaýymyz tıis. Jastar osy joldy tabandy túrde jalǵastyryp, kózdiń qarashyǵyndaı qorǵaýy kerek», - dedi jıynda sóz sóılegen oblystyq Qazaqstan halqy Assambleıasy tóraǵasynyń orynbasary Muratáli Qalmuratov.

Kezdesý barysynda «Turaqtylyq - tuǵyrymyz» taqyrybynda daıyndalǵan beınerolık kópshilik nazaryna usynyldy. Sondaı-aq, jastar jumyspen qamtý, bilim, kásipkerlik, din máselelerine qatysy ózderiniń kókeılerinde júrgen saýaldardyn qoıyp, sala mamandarynan tuşymdy jaýaptar aldy.