OQO-da «Altyn belgimen» bitirgen túlekter shekti 50 baldy da jınaı almaǵan

ShYMKENT. QazAqparat - Ońtústik Qazaqstan oblysynda bıylǵy jyly «Altyn belgimen» bitirgen 9 túlek shektik 50 baldy da jınaı almaǵan. Taǵy 4 túlek 0 degen ball alǵan. Bul týraly búgin «Qazaqstannyń jańǵyrýy 3.0 - bilimniń úlesi» oblystyq pedagogıkalyq tamyz konferentsııasynda málim boldy, dep habarlaıdy QazAqparat HAA tilshisi.

Oblystyq bilim basqarmasynyń basshysy Isataı Saǵyndyqovtyń aıtýynsha, aǵymdaǵy jyly jańa formatta ótkizilgen UBT tapsyrýdyń qorytyndysy kóńil kónshitpeı otyr.

«Atap aıtqanda oblysta «Altyn belgimen» bitirgen oqýshylardyń sany 43 paıyzǵa artqanymen, olardyń arasynda 100 baldy jınaı almaǵan oqýshylar tirkelip otyr. Endi atalǵan mektepterge zerdeleý, tekserý jumystary júrgizilip, tekseriledi. Al, túlekterdiń orta baly nebári 76,6 baldy quraǵan»,- dedi Isataı Ómirzaquly.

Synaqqa óńirdegi mektep bitirgen túlekterdiń 78 paıyzy qatysyp, olardyń jınaǵan baly respýlıka boıynsha sońǵy oryndarǵa turaqtaǵan. Osy rette basqarma basshysy muǵalimderdiń bilimin kóterý kerektigin atap ketti. Sondaı-aq óńirde jyldan jylǵa mektep oqýshylarynyń sany artyp keledi. Máselen, bılǵy jyly 11 synypty 33 myńnan asa túlek támamdasa, 1 synypqa 70 myńnan asa bala qabyldaý josparlanyp otyr. Oqýshylar sanynyń jyldan jylǵa kóbeıýine baılanysty mektep tashylyǵy da týyndap, búgingi tańda 200-deı bilim mekemesin salý qajettiligi oryn alyp otyr. Onyń 73-i respýblıkalyq bıýdjet esebinen salynbaq.