OQO-da agroónerkásip keshenin damytýdyń memlekettik baǵdarlamasy talqylandy

ASTANA. QazAqparat - Ońtústik Qazaqstan oblysy ákimdiginde QR Premer-mınıstriniń orynbasary - Aýyl sharýashylyǵy mınıstri Asqar Myrzahmetovtiń qatysýymen agroónerkásip keshenin damytýdyń memlekettik baǵdarlamasyn júzege asyrý boıynsha keńeıtilgen májilisi ótti. Jıyndy oblys ákimi Janseıit Túımebaev júrgizdi, dep habarlaıdy ákimdiktiń baspasóz qyzmeti.

Jıynda sóz alǵan vıtse-premer aýyl sharýashylyǵy óndiristik kooperatıvterin irilendirý boıynsha atqarylyp jatqan jumystardy baıandady.
 

«Memleket basshysy Joldaýda agrarlyq sektor -ekonomıkanyń jańa draıverine aınalýy tıis ekenin atap ótti. Osy tapsyrmaǵa saı agroónerkásiptik keshendi damytýdyń jańa memlekettik baǵdarlamasy ázirlendi. Ondaǵy negizgi maqsat - úı sharýashylyqtary men usaq sharýashylyqtardy kooperatıvterge biriktirý, ónimdi qajetti ınfraqurylymmen qaıta óńdeýdi ulǵaıtý. Ótken jyly osy tapsyrma aıasynda elimiz boıynsha 15 myń jeke qosalqy sharýashylyqty qamtyǵan 157 kooperatıv quryldy. Olardyń bazasynda 100-den astam sút qabyldaý pýnkti men jeti myńnan astam otbasylyq bordaqylaý alańy uıymdastyryldy», - dedi Asqar Isabekuly.

Elimizdiń aýyl sharýashylyǵy mınıstrligi aldaǵy bes jyl ishinde 500 myńnan astam jeke úı sharýashylyqtary men shaǵyn fermerlerdi kooperatıvterge tartyp, ónimniń óńdeý sapasyn jaqsartýǵa kúsh salmaq. Bul baǵytqa memleket bıýdjetinen 57 mıllıard teńge baǵyttalyp otyr. Nesıe sharýalarǵa 6 paıyzdyq jeńildikpen úlestiriletin bolady. Ondaǵy negizgi talap - kooperatıvke birigetin sharýa qojalyqtardyń sany 20-dan kem bolmaýy tıis.
 

Vıtse-premer sondaı-aq sýbsıdııalaý qaǵıdattarynyń qaıta qaralyp jatqanyna da keńinen toqtaldy. Búginde 11 sýbsıdııa túri alynyp tastalyp, 35 sýbsıdııa túriniń normatıvterine ózgerister engizilgen.

Atalǵan maqsat-mindetter Elbasy Jarlyǵymen bekitilgen Agroónerkásiptik keshendi damytýdyń 2017-2021 jyldarǵa arnalǵan jańa memlekettik baǵdarlamasyn iske asyrýdyń alǵy sharttary retinde belgilenip otyr.

Jıyn barysynda elimizdiń Aýyl sharýashylyǵy mınıstriliginen arnaıy kelgen dırektsııa basshylary jınalǵandarǵa kooperatıv qurýdyń negizgi alǵy sharttary men sýbsıdııalaý, qujattandyrý maqsatyndaǵy qaǵıdattardy jan-jaqty túsindirdi.

Baǵdarlamanyń basty maqsaty - aýyldyq jerlerde aýyl sharýashylyǵy kooperatsııalaryn damytý. Onyń aıasynda aýyl sharýashylyǵyndaǵy eńbek ónimdiligin 38 paıyzǵa, jalpy ónimin 30 paıyzǵa, azyq-túlik taýarlaryn eksporttaý kólemin 600 mln. AQSh dollaryna arttyrý jáne ımport kólemin 400 mln. AQSh dollaryna tómendetý qarastyrylǵan.