OQO-da 6 500-ge jýyq memqyzmetker attestattaýdan ótti

ASTANA. QazAqparat - OQO-da 6500-ge jýyq memqyzmetker keshendi attestattaýdan ótti. Bul týraly búgin Óńirlik kommýnıkatsııalar qyzmetinde ótken brıfıngte QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń OQO boıynsha departamentiniń basshysy Álı Kómekbaev málim etti, dep habarlaıdy ákimniń baspasóz qyzmeti.

Elbasynyń «100 naqty qadam» ult Josparynda memlekettik qyzmettiń kásibıligin arttyrý tapsyrmasy aıasynda júrgizilgen keshendi attestattaý qorytyndysyn baıandaǵan departament basshysy óńirdegi 8 700 memlekettik ákimshilik laýazymnyń 212-si bos oryndar, al qalǵan 8 489 memlekettik ákimshilik qyzmetshiniń 6 483-i attestatsııa tapsyrǵanyn jetkizdi.

«Ult josparynyń bir qadamy bul - elimizde alǵash ret ótkizilgen keshendi attestattaý. Keshendi attestattaý deıtin sebebimiz, bul memlekettik qyzmetshilerdi jaı ǵana synaqtan ótkizý emes.  Attestattaý kezinde buryn-sońdy memlekettik qyzmette bolmaǵan úderis - memlekettik qyzmetshiniń quzirettilik qasıetteri synalady. Qyzmetshilerdiń qyzmetti tutynýshylarǵa baǵdarlarlaný, qyzmetti tutynýshylarǵa habarlandyrý, qyzmetti basqarý, yntymaqtastyq, sheshim qabyldaý, jedeldilik, ózdiginen damý, adaldyq, jaýapkershilik, bastamashyldyq jáne stresske ornyqtylyq sııaqty quzyretteri boıynsha baǵalaý testileý arqyly júrgizildi», - dedi Á.Kómekbaev.

Jalpy oblysta barlyǵy 63 komıssııa qurylyp, ózderine júktelgen jumysty jaqsy atqaryp shyǵyp, attestattaýdy óz deńgeıinde ótkizgen. Attestattaýdy oń nátıjemen aıaqtaǵan 239 qyzmetshi joǵarylatýǵa usynylǵan. Qazirgi ýaqytta áńgimelesý kezeńinen 6 483 qyzmetker ótti. Oblys boıynsha 62 adam (1 paıyz) qyzmetine sáıkes emes dep tanylyp, laýazymynda tómendetilý usynyldy. Quzyrettilike sáıkestigi deńgeıin anyqtaý nátıjesi boıynsha 21 qyzmetshini (0,4 paıyz) atqaryp otyrǵan laýazymynan bosatý usynylǵan. Al, oblysta 94,9% memlekettik qyzmetshiler atqarǵan laýazymdaryna sáıkes dep tanyldy. Spıkerdiń aıtýynsha, bul kórsetiksh oblys boıynsha oń nátıje dep sanalady.