OQO-da 4 kópbalaly anaǵa turǵyn úı tartý etildi
Sharany Qazaqstan musylmandary dinı basqarmasynyń Ońtústik Qazaqstan oblysy boıynsha ókildigi men oblystyq «Zeket» qory birlesip uıymdastyrǵan bolatyn.
«Dinı basqarma jaǵdaıy tómen, kóp balaly, altyn qursaqty analar men ómir taýqymetin tartqan otbasylarǵa úı salyp berý jumysyn dástúrli túrde júrgizip keledi. Bıylǵy jyly Ońtústikte 8 úı salyndy. Bul sharalarǵa din qyzmetkerleri men jergilikti qoly ashyq jomart jandar demeýshilik jasady. Mundaı ıgi ister jyl saıyn jalǵasyn tabatyn bolady», - dep atap ótti Bas múftı.
QMDB tóraǵasy qaıyrymdylyq shara kezinde 4 otbasyǵa azyq-túlik, úı jıhazdary men ózge de turmystyq zattardy tartý etti.
Jalpy, árbir otbasyǵa bólingen jer telimi 8 sotyq, salynǵan ár úıdiń kólemi 120 sharshy metr. Aýyz sýmen qamtamasyz etý maqsatynda 280 myń teńgege ár úıge qosymsha jerasty qudyq sýy tartyldy. Sonymen qatar, 273 myń teńgege bir shaqyrym jerden 15 baǵana ornatylyp, elektr jaryǵy tartyldy. Salynǵan ár jeke úıge 7 mln teńge kóleminde qarajat jumsaldy.
Bas múftı asyl dinimizdiń órkendeýine jan-jaqty úles qosyp, halyqtyń áleýetin kóterýge atsalysyp kele jatqan jergilikti qaıyrymdy jandarǵa aıryqsha alǵysyn jetkizdi.