OQO-da 265 mlrd teńgeniń múlki men aqsha jarııa etildi
Bul týraly Aımaqtyq kommýnıkatsııalar qyzmetinde Qarjy basqarmasynyń basshysy Keńesbek Mendebaev pen OQO boıynsha Memlekettik kirister departamentiniń basqarma basshysy Ábdisalan Saǵymbektiń qatysýymen ótken brıfıngte málim boldy.
Qarjy basqarmasy basshysynyń aıtýynsha, jarııa etilgenderdiń ishinde quny 108,8 mlrd. teńgeni quraıtyn 11711 jyljymaıtyn nysan zańdastyrylǵan. Onyń 43,7 mlrd. teńgesi Shymkent qalasyna tıesili bolsa, 65,1 mlrd. teńge aýdan-qalalardyń úlesi. Jarııa etilgenderdiń ishinde quny 75,2 mlrd. teńgeni quraıtyn 10225 turǵyn úı, 33,6 mlrd. teńgelik 1486 kommertsııalyq jáne basqa da nysandar bar.
Al Qazaqstan Respýblıkasynan tys jerlerde ornalasqan, jalpy quny 422,3 mln. teńgeni quraıtyn 50 jyljymaıtyn múlik, 12 zańdy tulǵalardyń jarǵylyq kapıtalyna qatysý úlesi jáne 3 baǵaly qaǵazdar boıynsha qabyldanǵan ótinishter zańdastyryldy. Sonymen qatar 155,9 mlrd. teńge jarııa etildi.
«2016 jyldyń 30 jeltoqsanynda elimizdegi múlikter men qarjylardy jarııa etý jumystary aıaqtaldy. Qorytyndysynda joǵary kórsetkishterimen belsendilik tanytqan Ońtústik Qazaqstan oblysy elimizde tórtinshi oryndy ıelendi. Endi osy zańdastyrýdyń nátıjesinde jyl saıyn oblys bıýdjeti 55 mıllıon teńgege salyq túsimderimen kóbeıip otyratyn bolady. Jyljymaıtyn múlikterin bankterge kepilge qoıý arqyly nesıeler alyp bıznesin keńeıte alatyn azamattardyń qatary kóbeıdi. Olardyń kásipkerlikpen aınalysyp, óndiris ulǵaıtýǵa, tabysyn eseleýge múmkindikteri mol. Munyń oblysymyzdyń ekonomıkasyn tıimdi damytýǵa kómegi kóp bolatyny sózsiz», - dedi Keńesbek Núsipqululy.
«Endi elimizde zańdastyrylmaǵan múlik úshin eshqandaı eskertýsiz birden 530250 teńge (250 AEK) aıyppul salynady. Al eger bul talap bir jyl ishinde oryndalmasa, zańsyzdyq joıylmasa, 500 AEK kóleminde aıyppul tóletiledi. Múlki men qarjysyn zańdastyryp úlgermegenderdi osyndaı jaza kútip tur. Al osy úsh kezeńde barlyq dúnıesin jarııa etkender týarly málimet eshkimge berilmeıdi jáne olar memleket tarapynan barlyq jaǵynan qorǵalady», - dedi Ábdisalan Jorauly.
Qazaqstan azamattary 2020 jyldan bastap jappaı tabys deklaratsııasyn tapsyrady.