OQO: Arysta densaýlyq nysandary ashyldy

ASTANA. QazAqparat - Qazaqstan Respýblıkasynyń densaýlyq saqtaý salasyn damytýdyń 2016-2019 jyldarǵa arnalǵan «Densaýlyq» memlekettik baǵdarlamasy aıasynda Arys qalasyndaǵy Sanaly jáne Shaǵyr eldi mekenderinde feldsherlik ambýlatorııalyq beket qoldanysqa berildi. Bul týraly OQO-nyń baspasóz qyzmetinen málim etti.

1 jeltoqsan - Tuńǵysh Prezıdent kúnine oraı ótken ashylý saltanatyna qala ákimi Murat Bolatuly qatysty. Densaýlyq saqtaý nysandary oblystyq bıýdjet esebinen salyndy.

«Memlekettiń basty baılyǵy - halyq. Al halyqtyń basty baılyǵy - densaýlyǵy. Bul úshin ár eldi mekendi aýrýhanamen qamtamasyz etý baǵytynda jumys atqarýymyz tıis», - degen M.Bolatuly barsha turǵyndardy merekemen quttyqtady.

Medıtsınalyq nysanda feldsherlik jáne  akýsherlik kabınetter, ekpe bólmesi ornalasqan. Kabınetterdiń bári de tolyqtaı zamanaýı jańa úlgidegi apparattarmen jabdyqtalyp, bilikti mamandar aýyl turǵyndarynyń barlyǵyna da qajetti medıtsınalyq kómek kórsetýge ázir. Endi munda kúndelikti densaýlyǵyna shaǵymdanǵan jandarǵa kez kelgen kómek kórsetiletin bolady.
  

Budan bólek, osy kúni Arys qalasynda Qazaqstan Respýblıkasynyń Prezıdenti N.Á.Nazarbaevtyń «Bolashaqqa baǵdar: rýhanı jańǵyrý» atty baǵdarlamalyq maqalasyndaǵy «Týǵan jer» baǵdarlamasyn júzege asyrý maqsatynda jeke kásipker M.Erjigitovtiń bastamasymen jańadan boı kótergen zamanaýı «MADANI» qonaq úı kesheni ashyldy.
 
 

Bul nysannyń ashylýymen jańadan jumys oryndary qurylyp, qalanyń týrıstik áleýeti arta túspek.  Eki qabatty ǵımaratta zaman talabyna saı jasaqtalǵan qonaq bólmeler, ashana, avtokólik jýý, avtokólik jóndeý tsehtary ornalasqan.