OQO ákimi jergilikti sheneýnikterge HQKO-larǵa barmaýdy tapsyrdy

ShYMKENT. QazAqparat -  Ońtústik Qazaqstan oblysynyń ákimi Janseıit Túımebaev óńirdegi memlekettik organdardyń basshylary men qyzmetkerlerine Halyqqa qyzmet kórsetý ortalyqtaryna barmaýdy tapsyrdy. Bul týraly ol oblys ákimdigi janyndaǵy sybaılas jemqorlyqqa qarsy kúres máseleleri jónindegi komıssııa otyrysynda aıtty, dep habarlaıdy QazAqparat tilshisi.

Jıyn barysynda aımaq basshysy sheneýnikterge  memlekettik qyzmetterdi egov.kz portaly arqyly elektrondy túrde alyp, basqalarǵa úlgi bolýǵa shaqyrdy. Otyrysta memlekettik qyzmetterdi kórsetý úderisin meılinshe ońtaılandyrý jáne qyzmetterdi elektrondyq formatqa tolyǵymen kóshirý máselesi aıtyldy.

Bul rette, Memlekettik qyzmet isteri jáne sybaılas jemqorlyqqa qarsy is-qımyl agenttiginiń OQO boıynsha departamenti ókilderi elektrondy túrde qyzmet alý tásilderin túsindiretin eki tilde beınerolık ázirlep, memkyzmet.kz saıtynyń egov.kz aıdaryna ornalastyrǵanyn jetkizdi. Sebebi, halyqtyń kompıýterlik saýattylyǵynyń tómendigi men qyzmetterdi elektrondy túrde alý tásilderin jetik meńgermeý saldarynan elektrondy qyzmet úlesi mardymsyz.

Beınerolık oblystaǵy HQKO-lardyń 33 bólimshesinde eki aı kóleminde kórsetiledi. Sonymen birge aımaqtyq oqytý ortalyǵy men joǵary oqý oryndarynda, kolledjder men mektepterde kórsetiletini josparlanǵan. Budan bólek, vıdeo barlyq memlekettik mekemeler qyzmetkerleriniń derbes kompıýterlerine ornalastyrylǵan.