OQO ákimi jazýshy-dramatýrg Dýlat Isabekovpen kezdesti

ShYMKENT. QazAqparat - Búgin Ońtústik Qazaqstan oblysynyń ákimi Janseıit Túımebaev jazýshy-dramatýrg Dýlat Isabekovtiń 75 jyldyq mereıtoıyna arnalǵan «Ultyn súıgen dara tulǵa» atty shyǵarmashylyq keshine kelgen qonaqtarmen kezdesti, dep habarlaıdy QazAqparat oblys ákiminiń baspasóz qyzmetine silteme jasap.

Olardyń qatarynda mereıtoı ıesi QR Memlekettik syılyqtyń laýreaty, «Qurmet» ordeniniń ıegeri, Halyqaralyq PEN klýby jáne Platınaly «Tarlan» syılyqtarynyń laýreaty, jazýshy-dramatýrg Dýlat Isabekov, jazýshy, «Qurmet» ordeniniń ıegeri Beksultan Nurjekeev, Halyqaralyq «Alash» ádebı syılyǵy men «Qurmet» ordeniniń ıegeri Qazybek Isalar bar.  

Kezdesýde sóz alǵan óńir basshysy mereıtoı ıesin quttyqtap, «Ultyn súıgen dara tulǵa» atty shyǵarmashylyq keshtiń sátti ótýine tilegin bildirdi.

«Biz Sizdi jazýshy, dramatýrg, ultymyzdyń bolmys-bitimin sol kúıi keleshekke jetkizýshi retinde, ulttyq ádebıetimizdiń álemdik deńgeıde tanyla túsýine erekshe úles qosyp kele jatqan, óziniń dara joly bar el azamaty retinde maqtan tutamyz. Bıylǵy jyldyń qazan aıynda Ulybrıtanııa astanasy London tórinde lordtar palatasynda arnaıy qabyldaý ótip, «Pesalar jınaǵy» kitabyńyzdyń tusaýy kesilip, «Aqqý jibek» atty pesańyzdyń qoıylymynyń ótýimen Sizdi shyn júrekten quttyqtaımyn», - dedi Janseıit Qanseıituly.

Dýlat Isabekov - qazaq ádebıetinde eshkimge uqsamaıtyn, tyńnan túren salǵan jazýshy. Týyndylarynyń ár sózi tiri, ár sózi máńgilik qozǵalysta. Óıtkeni, Dýlat Isabekov kúrdeli zamannyń tól jazýshysy.  Ótken ǵasyrdyń 60-shy jyldary «Jolda» áńgimesi jaryq kórip, keıinen «Beket», «Aşy bal», «Mazasyz kúnder», «Qara shańyraq», «Tirshilik» povester men áńgimeler jınaqtary jaryq kórse, 80-shi jyldary «Qarǵyn» romany basylyp shyqty.

Kezdesýde sóz alǵan jazýshy Beksultan Nurjekeev Dýlat Isabekovtiń qazaq ádebıetin damytýǵa qosqan úlesine toqtaldy.  Al, aqyn Qazybek Isa halyq jazýshysynyń ómir ǵumyrdarııasynan keńinen sóz qozǵady.

Kezdesýdi qorytqan oblys ákimi mereıtoı ıesi men qonaqtarǵa syı-sııapat jasap, baǵaly syılyqtar tabys etti.

Aıta keteıik, búgin J.Shanın atyndaǵy oblystyq akademııalyq qazaq drama teatrynda Dýlat Isabekovtiń 75 jasqa tolýyna arnalǵan «Ultyn súıgen dara tulǵa» atty shyǵarmashylyq keshi uıymdastyrylmaq. Sonymen qatar, teatr sahnasynda respýblıkalyq uıǵyr mýzykalyq komedııa teatry artısteriniń oryndaýynda jazýshynyń «Muragerler» atty qoıylymy kórermender nazaryna usynylmaq.