OQO ákimi Úndistan elshisimen kezdesti

ShYMKENT. QazAqparat - Ońtústik Qazaqstan oblysynyń ákimi Janseıit Túımebaev Úndistannyń Qazaqstandaǵy Tótenshe jáne ókiletti elshisi Prabhat Kýmarmen kezdesti. Taraptar eki el arasyndaǵy saýda-ekonomıkalyq jáne mádenı-gýmanıtarlyq baǵyttardy talqylady, dep habarlaıdy  QazAqparat tilshisi.

Kezdesý barysynda aımaq basshysy mártebeli meımanǵa jyldyń basynda resmı túrde bastalǵan Qazaqstandaǵy dıplomatııalyq mıssııasyna sáttilik tilep, yntymaqtastyq jyldarynda Qazaqstan men Úndistan iri saýda jáne ınvestıtsııalyq áripteske aınalǵanyn atap ótti. 

Óńir basshysy halyqtyń tyǵyz ornalasýy jaǵynan oblystyń Qazaqstandaǵy aldyńǵy qatarda ekenin aıttty, óndiristik jáne ekonomıkalyq áleýeti mol agrarlyq-ındýstrııalyq aımaq ekenin jetkizdi. Sondyqtan da Ońtústik pen Úndistannyń óńirleri arasynda ózara tıimdi saýda-ekonomıkalyq qatynastardy damytý jáne mádenı-gýmanıtarlyq yntymaqtastyqty arttyrýǵa múmkindiktiń mol ekenine senim bildirdi.


Óz kezeginde Úndistan elshisi týrızm, mádenıet jáne bilim salasynda áriptestikti damytýǵa daıyn ekenin aıtyp, 2017 jyldyń sáýir aıynda Úndistan delegatsııasy Ońtústik Qazaqstanda jumys saparymen bolǵanyn eske saldy.

Maqta eksportyn damytý boıynsha quralǵan úndistandyq delegattar Ońtústik óńirindegi birqatar jeńil ónerkásip salasyndaǵy kásiporyndardyń jumysymen tanysqanyn aıtqan elshi osy baǵytta da áriptestik ornatýǵa daıyn ekenin málim etti.
 

Aıta keteıik, búginde eki el arasynda ózara tıimdi seriktestik pen óte tyǵyz qarym-qatynas ornatylǵan. Táýelsizdik alǵan jyldardan beri Qazaqstanǵa Úndistannan 339,6 mln AQSh dollaryn quraıtyn ınvestıtsııa tartylǵan. Al, ótken jyly qos eldiń arasyndaǵy taýar aınalymy - 945,7 mln AQSh dollaryn qurasa, onyń ishinde eksport - 733,2 mln AQSh dollaryn, ımport - 2,12 mln AQSh dollaryn quraǵan.