OQO ákimi týǵan jerdi túletýge kásipkerlerdi jumylýǵa shaqyrdy

ASTANA. QazAqparat - Búgin Ońtústik Qazaqstan oblysynyń ákimi Janseıit Túımebaev oblystyq Kásipkerler palatasynyń uıytqy bolýymen ótken erkin formattaǵy kásipkerler kezdesýine qatysty. Jıyndy OQO Kásipkerler palatasynyń dırektory Asqar Abýbakırov júrgizip otyrdy, dep habarlaıdy ákimniń baspasóz qyzmeti.    

Jıynǵa oblys ákiminiń orynbasarlary men óńir kásipkerleri jáne bank dırektorlary, memlekettik mekeme basshylary, damý ınstıtýttarynyń jetekshileri men  BAQ ókilderi  qatysty.

Kezdesý barysynda  Elbasynyń «Bolashaqqa baǵdar: rýhanı jańǵyrý» atty maqalasynan týyndaǵan maqsat-mindetter saralanyp, óńirdiń damý kontseptsııasy talqylandy. Bıznestiń órkendeýine memleket tarapynan jasalynyp otyrǵan qoldaýlar men kásipkerlerdi qarjylandyrý júıesiniń jańa tetikteri sóz boldy.

Týǵan jerdi túletý - ortaq paryz ekenin aıtqan oblys ákimi J.Túımebaev kásipkerlerdi týǵan jerge, elge degen súıispenshilik pen janashyrlyqtyń úzdik úlgisin kórsetýge shaqyrdy.

«Búgingi tańda, memleket tarapynan bıznestiń órkendeýine barlyq qolaıly jaǵdaılar jasalynyp otyr. Sonyń nátıjesinde tek sońǵy 3 jylda oblysymyzda «Ońtústik» aımaqtyq ınvestıtsııalyq ortalyǵy arqyly  jalpy quny 23,4 mlrd. teńgeni quraıtyn  5,7 myńǵa jýyq joba qarjylandyryldy. Bul degenińiz jaqsy kórsetkish. Desek te, alda atqarylatyn jumystar áli de az emes. Bul rette men bıznestiń áleýmettik jaýapkershiligi men óńir ekonomıkasyn órkendetýde jeke kásipkerlerdiń qosyp júrgen úles, yqpalynyń zor ekenin aıtqym keledi», -dedi Janseıit Qanseıituly.

Sonymen qatar, ákim bıznesmenderge saýda ortalyqtary men sıtı keshenderin salýdy toqtatyp, halyqqa qajetti turǵyn úı men stýdentterge arnalǵan jataqhana salýdy jáne óńirdiń ekonomıkasyna septigin tıgizetin týrısttik jobalardy salý jaıyn kóterip, sol jobalardy júzege asyrýǵa shaqyrdy.

Munan bólek, jıynda oblys ákiminiń orynbasarlary óz salalalary boıynsha memlekettik-jekeshilik áriptestik aıasynda júzege asyrylýy tıis jobalardy tanystyryp, bul baǵytta memleketten kórsetiletin qoldaýlardy aıtyp ótti.

Onda oblys ákiminiń birinshi orynbasary Darhan Satybaldy  memlekettik-jekeshilik áriptestik sheńberinde 35 joba salý usynylyp otyrǵanyn atap ótti. Al oblys ákiminiń orynbasary Baýyrjan Jamalov Túrkistan qalasy men Saryaǵash, Shardara, Tóle bı aýdandarynda iske asyrylatyn týrısttik jobalar men basqa da aýdandarda iske asyrýǵa bolatyn aýyl sharýashylyq, óndiristik baǵyttaǵy jobalardy tanystyrdy.

Júzge jýyq kásipkerler bas qosqan jıynda olar bıznestiń áleýmettik jaýapkershiliginen týyndaıtyn ıdeıalardyń júzege asýynda jáne bızneske kedergi bolyp otyrǵan negizgi ózekti máseleler týraly pikirlerimen bólisip, oblystyń damýy boıynsha óz usynystaryn jetkizdi.