OQO ákimi Qytaımen týrızm salasyndaǵy yntymaqtastyqty talqylady

ShYMKENT. QazAqparat - Ońtústik Qazaqstan oblysynyń ákimi Janseıit Túımebaev Qytaı Halyq Respýblıkasynyń Almatydaǵy Bas konsýly Chjan Veı myrza bastaǵan qytaılyq konsýldyq ókilderimen kezdesti, dep habarlaıdy QazAqparat tilshisi.

Taraptar kezdesý barysynda eki el arasyndaǵy saýda-ekonomıkalyq, mádenı-gýmanıtarlyq jáne týrızm salasyndaǵy yntymaqtastyqtyń perspektıvaly baǵyttaryn keńeıtý máselelerin talqylady.

Óz kezinde oblys ákimi óńirdiń áleýmettik-ekonomıkalyq damý jaǵdaıy, bolashaqtaǵy damý múmkindikteri men qolǵa alynyp jatqan irgeli jobalar týraly baıandady. Qazaqstan men Qytaı arasynda strategııalyq seriktestik pen túrli salalarda tyǵyz qarym-qatynas ornaǵanyn aıtqan oblys ákimi shırek ǵasyrda eki memlekettiń senimdi jáne mazmundy dıalogy ornatylǵanyn jetkizdi.

«Búginde eki eldiń ekonomıkalyq yntymaqtastyǵy aıtarlyqtaı alǵa jyljyp, qos eldiń arasyndaǵy qarym-qatynas nyǵaıa tústi. Máselen, Qazaqstan men Qytaı arasyndaǵy Indýstrııalandyrý jáne ınvestıtsııalar salasyndaǵy yntymaqtastyq týraly kelisimniń sheńberinde elimizde 51 joba júzege asyrylýda»,-dedi aımaq basshysy.

Ákim sonymen qatar Ońtústik Qazaqstan oblysy men Qytaıdyń óńirleri arasyndaǵy ózara tıimdi saýda-ekonomıkalyq jáne ınvestıtsııalyq yntymaqtastyqty damytýǵa zor múmkindikter bar ekenine senim bildirip, aýyl sharýashylyǵy men ónerkásip jáne týrızm salasynda áriptestik baılanysty damytýǵa daıyn ekenin jetkizdi.

Al, Bas konsýl bul ońtústik óńirine jasaǵan tórtinshi sapary ekenin aıta kele oblystyń barlyq baǵyttar boıynsha damyp jatqanyna kýá ekenin aıtty.

«Ońtústik Qazaqstan eldegi kóptegen kórsetkishter boıynsha kósh ilgeri ekendigin bári biledi. Munda ınvestorlar úshin qolaıly jaǵdaı jasalǵan. Sondyqtanda eki taraptyń múddelerine saı keletin birqatar usynystardy jetkizsem deımin. Máselen, aýyl sharýashylyǵy ónimderi men azyq-túlik ónimderin qaıta óńdeý salasy men turmystyq qaldyqtardy qaıta óńdeý, energııa kózderin damytý jáne qalalyq jáne naryqtyq ınfraqurylym qurylysy aıasyndaǵy yntymaqtastyqty keńeıtý»,-dedi Chjan Veı.

Oblys ákimi jalpy eki taraptyń da áleýmettik-ekonomıkalyq damýy turǵysynan óz tıimdiligin kórsetetin bul usynystardy qoldaıtyndyǵyn aıtyp, eki eldiń Memleket basshylarynyń bastamasymen qolǵa alynǵan «Nurly jol» baǵdarlamasy men «Jibek jolyn» jańǵyrtý jobalaryn sapaly oryndaý baǵytynda yntymaqtasa jumys isteýge nıet bildirdi.