OQO ákimdiginde Elbasy tapsyrmalary talqylandy

ShYMKENT. QazAqparat - Búgin Ońtústik Qazaqstan oblysynyń ákimdiginde aýdan, qala ákimderimen selektorlyq jıyn ótti. Oblys ákiminiń tóraǵalyǵymen ótken májiliste 9 aqpan kúni Úkimettiń keńeıtilgen otyrysynda Memleket basshysy N.Nazarbaev júktegen mindetterdi óńirde júzege asyrý jaıy talqylanyp, birqatar sala jetekshilerine naqty tapsyrmalar júkteldi, dep habarlaıdy QazAqparat tilshisi.

Úkimettiń otyrysynda elimizdiń 2017 jylǵy áleýmettik-ekonomıkalyq damý qorytyndylary týraly aıtylǵanyn atap ótken aımaq basshysy aldaǵy ýaqytta atalmysh tapsyrmalardy júzege asyrýdyń jaıy talqylandy.

«Keńeıtilgen otyrystyń qorytyndysy boıynsha Elbasy ındýstrıalandyrý, «Nurly jol» men «Nurly jer» memlekettik baǵdarlamalary men Ult jospary -100 naqty qadamnyń iske asyrylýy, qoǵamdyq sanany jańǵyrtý, zańnyń ústemdigin qamtamasyz etý, sybaılas jemqorlyqpen kúres baǵyttarynda jumystardy qatań baqylaýǵa alyp, naqty nátıjege qol jetkizýdi tapsyrdy. Sonymen qatar Memleket basshysy oblys ákimderine baǵa naryǵyn turaqtandyrýdy, halyqtyń ál-aýqaty basty nazarda bolý qajettigin tapsyryp, kómir máselesimen qamtamasyz etýdi, kóktemgi tasqyn sýdyń aldyn alý boıynsha tıisti jumystardy atqarýdy júktedi», - dedi Janseıit Túımebaev.

Úkimettiń keńeıtilgen otyrysynda Prezıdent tsıfrlandyrý júıesiniń tıimdiligine keńinen toqtalǵanyn jetkizgen oblys ákimi bul másele boıynsha Elbasy óz Joldaýynda jan-jaqty aıtyp, naqty tapsyrmalar júktegenin atap ótti.

«Osy oraıda, tsıfrlandyrý júıesin ónerkásip pen densaýlyq saqtaý jáne bilim berý salasyna endirý boıynsha jumystardy kúsheıtýdi, sondaı-aq tsıfrlandyrýdy basqa salaǵa da engizý úshin arnaıy top quryp, shuǵyl tıisti sharalardy qolǵa alýdy tapsyramyn. Budan bólek, oblysta aýyl sharýashylyǵy, ónerkásip jáne týrızm baǵytyn damytý boıynsha qajetti sharalardy kúsheıtýimiz qajet. Munyń ishinde aýyl sharýashylyǵy óńirdiń ekonomıkalyq draıveri. Sondyqtan da basqarmaǵa Aýyl sharýashylyǵy mınıstrligimen birlese otyryp, damytýdy qajet etetin baǵyttardaǵy jumystardy jetildirýdi jáne nátıjeli kórsetkishke qol jetkizip, sapaly ónim shyǵaryp eksport kólemin arttyrýdy júkteımin», - dedi aımaq basshysy.

Jıynda aýdan, qalada ınvestorlardy tartý boıynsha belsendi áreketke kóshý kerektigi eskertildi. Oblys basshysy barlyq ákimderge kásiporyndar ashýdy jáne turǵyndardyń ál-aýqatyn jaqsartý baǵytyndaǵy jumystardy basty nazarda ustaýdy júktedi.

Selektorlyq májilisti qorytyndylaǵan Janseıit Túımebaev Úkimet qabyldaǵan barlyq baǵdarlamalar men bıylǵy Joldaýda qoıylǵan mindetterdi tolyq oryndaý aldymyzda turǵan basty mindet ekendigin aıtyp, ony júzege asyrýǵa jumylýǵa shaqyrdy.