ÓKM Operatoryna qatysty is: Advokat sýdıany aýystyrýdy talap etti

ASTANA. QazAqparat – «ÓKM Operatory» JShS-ge qatysty qylmystyq is boıynsha aıyptalyp jatqan Rýstam Temirbektiń advokaty protsesti júrgizip jatqan sýdıany aýystyrýdy talap etti, dep habarlaıdy QazAqparat tilshisi.

«R.Temirbekti aıyptaýdyń úsh epızody boıynsha qylmystyq qýdalaýdy toqtatý jáne tergeýshiniń ótinishterde baıandalǵan Qylmystyq is júrgizý kodeksiniń 31-taraýynyń talaptaryn oryndamaýy máseleleri jónindegi dálelderiniń eshqaısysy tekserilmegen. Sot ony óz qaýlysynda teriske de shyǵarmaǵan. Bul qylmystyq is júrgizý zańynyń talaptaryna qaıshy jáne bul isti aldyn ala tyńdaý kezindegi júıeli tekseristiń bolmaǵanyn kórsetedi», - dedi advokat Sholpan Sársenova sot protsesi barysynda.

Onyń aıtýynsha, qazirgi ýaqytta prokýror da, sot ta aıyptalýshynyń shaǵymyn qaramaǵan. ıAǵnı, osy bólikte Qylmystyq is júrgizý kodeksiniń talaptary oryndalmaı otyr.

«Mundaı jaǵdaılarda prokýror shaǵymdy qaraǵanǵa deıin is sotqa joldanbaıdy. Bul Qylmystyq is júrgizý kodeksiniń 297-baby 7-bóliginde aıqyndalǵan», - dep toqtaldy Sholpan Sársenova.

Onyń aıtýynsha, sotqa deıingi is júrgizý satysynda aıyptalýshylar qylmystyq iske qatysty materıaldarymen de tanyspaǵan.

Alaıda, sot bul iske qatysty basqa sýdıa taǵaıyndaý týraly advokat ótinishin qanaǵattandyrmady.

Qosa keteıik, búgin elordada «ÓKM Operatory» JShS-ge qatysty basty sot talqylaýy bastaldy.