Ókinishke qaraı, bizdiń ulttyq tarıhymyzda jasyq oılar men tujyrymdar qaptap júr - M. Qoıgeldi

ASTANA. 5 maýsym. QazAqparat - Ókinishke qaraı, bizdiń ulttyq tarıhymyzda jasyq oılar men tujyrymdar qaptap júr. Búgin QR Memlekettik hatshysy Marat Tájınniń tóraǵalyǵymen ótken Qazaqstan Respýblıkasynyń ulttyq tarıhyn zerdeleý jónindegi vedomstvoaralyq jumys tobynyń keńeıtilgen otyrysy barysynda tarıh ǵylymynyń doktory, professor Mámbet Qoıgeldi osyndaı pikir bildirdi.

«Memlekettik hatshy búgin otandyq tarıhty zertteý men oqytýdyń irgeli máselelerin qozǵady dep sanaımyn. Ol tarıhty zertteýdiń metodologııasymen birge onyń tili de ózgerýi tıistigin aıtty. Durys qoıylǵan másele. Sonymen qatar ult tarıhyn sońǵy bes ǵasyrmen shekteý durys emestigin, ulttyq tarıhtyń tamyry ar jaqta jatqanyn aıtyp, oǵan álemdik kontekste qaraý, jasyq oılar men jasyq tujyrymdardan aryltý qajettigin alǵa tartty. Ókinishke qaraı, bizdiń ulttyq tarıhymyzda jasyq oılar men tujyrymdar qaptap júr. Biz kóp jaǵdaıda reseılik metodologııaǵa, eýrotsentrıstik kózqarasqa táýeldi bolyp keldik. Mundaı eski tujyrym, ustanymmen biz jańa tarıhty jaza almaımyz», - dedi M. Qoıgeldi.

Onyń aıtýyna qaraǵanda, jańa tarıhty jazý úshin jańasha, tyń ári táýelsiz ustanym kerek. «Taǵy bir kóńil aýdaratyn dúnıe - ulttyq tarıh, meıli ol zertteý bolsyn, oqytý bolsyn, memlekettik mártebege laıyq bolýy kerek. ıAǵnı, laıyqty dárejede zerttelip, laıyqty dárejede oqytylýy tıis», - dedi ol.