Ókildi bılik tarmaǵyn qaıta qurý qalaı júzege asyrylady

NUR-SULTAN. QazAqparat – Májiliske zańdar qabyldaý quqyǵy beriledi. Bul týraly búgin Úkimet otyrysynda QR Ulttyq ekonomıka mınıstri Álibek Qýantyrov aıtty, dep habarlaıdy QazAqparat tilshisi.

Onyń aıtýynsha, «Memleket basshysynyń Joldaýyn iske asyrý jónindegi jalpyulttyq is-sharalar josparynyń «Ókildi bılik tarmaǵyn qaıta qurý» baǵytynda 4 is-shara josparlanǵan.

«Zańnamaǵa tómendegideı ózgeristerdi engizý arqyly Parlament Senatyn jasaqtaý tártibi men onyń birqatar fýnktsııalary qaıta qaralatyn bolady. Atap aıtqanda, Senattaǵy prezıdenttik kvota 15-ten 10 depýtatqa deıin qysqarady, onyń ishinde 5 depýtatty Qazaqstan halqy Assambleıasy usynady. Qazaqstan halqy Assambleıasynyń kvotasy Májilisten Senatqa beriledi», - dedi ol.

Mınıstrdiń aıtýynsha, Parlament Májilisi qabyldaǵan zańdardy Parlament Senatynyń maquldaý nemese maquldamaý quqyǵyn berý, Parlament Senatynyń ókilettikterin Konstıtýtsııalyq Keńestiń jáne Joǵary sot Keńesiniń tóraǵalary laýazymdaryna kandıdatýralardy kelisý quqyǵymen tolyqtyrý kózdeledi.

«Parlament Májilisine zańdar qabyldaý quqyǵy beriledi. Budan basqa, Esep komıtetiniń ornyna Joǵary aýdıtorlyq palata qurylady. Sonymen qatar, zańnamaǵa Prezıdenttiń oblys, respýblıkalyq mańyzy bar qala jáne astana ákimderi laýazymdaryna balamaly negizde keminde eki kandıdatýra engizý quqyǵyn, sondaı-aq máslıhat tóraǵasy laýazymyn engizýdi reglamentteıtin túzetýler ázirlenetin bolady», - dedi Álibek Qýantyrov.