Oq-dári qoımalaryndaǵy órt qaýipsizdigine kimder jaýapty

<p>Tótenshe jaǵdaılar mınıstri Syrym Sháriphanov keıbir oq-dári qoımalaryndaǵy qaýipsizdik máselesine qatysty tıisti zertteý jasaý kerek ekenin aıtty, dep habarlaıdy&nbsp;<a href="https://kaz.inform.kz/" target="_blank" rel="noopener">QazAqparat tilshisi.</a></p>

Búgin Parlament Májilisinde azamattyq qorǵaý taqyrybyn talqylaý kezinde depýtattar Qorǵanys mınıstrligine qarasty oq-dári qoımalaryndaǵy órt qaýipsizdigi qalaı tekserilip jatqanyn surady.

Óz kezeginde Tótenshe jaǵdaılar mınıstrliginiń ókilderi Qorǵanys mınıstrliginiń qurylymynda tıisti bólimshe bar ekenin jáne olar qoımalardy tekserip jatqanyn aıtty.

«Bul máselemen jeke aınalysqan bolatynmyn. Qarý-jaraq saqtalatyn bazalar men qoımalardyń ózindik erekshelegi bar. Keıbir oq-dárini sýmen óshirgen kezde qaýipti jaǵdaı bolýy múmkin, ıaǵnı hımııalyq jaǵynan erekshe bul zattarǵa sý tıgende tıisti reaktsııa bolýy yqtımal. Sondyqtan osy salada ǵylymı-zertteý jumystaryn iske asyrý kerek. Bul turǵyda Qarýly kúshterge tıisti usynystardy jasaǵanbyz», –dedi Tótenshe jaǵdaılar mınıstri Syrym Sháriphanov.

Onyń aıtýynsha, Qorǵanys mınıstrligi bul máseleni qarastyryp, tıisti sheshim jasaýy kerek.

«Sebebi órt kezinde árbir oq-dárini qalaı óshirý kerek ekenin qaraý qajet», –dedi vedomstvo basshysy.

Budan buryn habarlanǵandaı, búgin Májiliste Qazaqstannyń batys óńirleri seısmologııa turǵysynan qaýipti aımaqqa aınalyp bara jatqany aıtyldy.