Ogaıo turǵyndary ýly zat tıelgen poıyz apatynan keıin bastary aýyryp, jótelip jatyr
Ogaıo densaýlyq saqtaý departamenti men AQSh Densaýlyq saqtaý jáne áleýmettik qyzmet mınıstrligi júrgizgen saýalnama nátıjesi juma kúni jarııalandy.
Ogaıo gýbernatory Maık Devaınnyń keńsesi málimdegendeı, jergilikti turǵyndar sharshap, ashýshań bolyp, terileri aýyryp, shaǵymdanǵan.
Saýalnamaǵa 168 adam qatysty. Saýalnamaǵa qatysýshylardyń ortasha jasy 57 jas, olardyń bári 18 jastan asqan. Respondentterdiń 74%-y poıyz apatynan keıin bas aýrýyna shaldyqqanyn málimdegen. On adamnyń altaýy jótele bastaǵan.
Ogaıo gýbernatory keńsesiniń málimeti boıynsha, shtattyń qorshaǵan ortany qorǵaý agenttigi poıyz apatynyń barysyn baqylaıdy. Josparǵa sáıkes, joldardy montajdaý, qazý jáne relsterdi qaıta jasaý 30 sáýirge deıin aıaqtalýy kerek.
Ogaıo shtatynyń qorshaǵan ortany qorǵaý agenttigi poıyz apatynan shamamen 1700 tonna qatty qaldyq shyǵarylǵanyn aıtty.
Bılik birneshe ret adamdardyń úılerine orala alatynyn málimdegen edi, óıtkeni qalada aýanyń lastaný deńgeıi baıqalmaǵan.
AQSh qorshaǵan ortany qorǵaý agenttigi Norfolk Southern basqarýshy kompanııasyna Shyǵys Palestınadaǵy 38 temirjol vagonynyń apat saldaryn joıý shyǵyndaryn jabýdy buıyrdy.
Gýbernatordyń aıtýynsha, kompanııa zaqymdalǵan jabdyqtar úshin órt sóndirý bólimderine 5 mıllıon dollar jáne Bıver jáne Loýrens okrýgterinde bıznes ıeleri men poıyz apatynan zardap shekken turǵyndarǵa kómektesý úshin 1 mıllıon dollar tóleıdi.
Eske sala keteıik, aqpan aıynyń basynda Amerıkanyń Ogaıo shtatynyń soltústik-shyǵysynda poıyz apatynan qatty órt shyqqan bolatyn.
Poıyzda zııandy zattar tıelgen 20 vagon bolǵan, onyń 10-y relsten shyǵyp ketti. Osy on vagonnyń beseýinde vınılhlorıd ýly zaty bolǵan.