Oblystyq máslıhattardyń jartysynda óz saıttary joq - ÚEU sarapshylary
«Qazaqstanda bıýdjet áleýmetke baǵdarlanǵan jáne de azamattardyń ál-aýqatyna tikeleı yqpal etedi. Soǵan qaramastan, bıýdjet jobasyn talqylaý isine halyq tartylmaı otyr, sonymen birge, bıýdjetti qalyptastyrýǵa yqpal etýi úshin onyń múmkindigi joq. «QR Jergilikti memlekettik jáne ózin-ózi basqarýy týraly» zańynyń 13-babynda máslıhattyń turaqty komıssııalarynda qoǵamdyq tyńdaýlardy ótkizý múmkindigi qarastyrylǵanmen, bul tájirıbe óte az paıdalanylyp otyr. Aqmola oblystyq máslıhatynyń 2010 jáne 2011 jylǵy bıýdjet jobasy boıynsha 2 ret qana qoǵamdyq tyńdaý ótkizgeni sonyń naqty aıǵaǵy», - deıdi «Ekonomıkalyq jáne quqyqtyq reformalarǵa qoldaý kórsetý ortalyǵy» qoǵamdyq birlestiginiń dırektory Ásel Qyryqbaeva.
«Ekonomıkalyq zertteýler, baǵalaýlar men monıtorıng jasaý ortalyǵy» qoǵamdyq qorynyń sarapshysy Sholpan Áıtenovanyń aıtýynsha, Qarjy mınıstrligi 2013 jylǵa arnalǵan respýblıkalyq bıýdjet jobasy men qoldanýshylarǵa yńǵaıly grafıkalyq beıne túrindegi aqparatty óziniń saıtynda jarııalady. Al jergilikti deńgeıdegi máslıhattar, qarjy basqarmalary óziniń saıt betterinde máslıhat sessııasynyń bıýdjet týraly sheshimder jobasyn jarııalamaıdy jáne de qoǵamdyq tyńdaýlardy ótkizbeıdi. Bul jaǵdaı elimizdiń oblystyq máslıhattarynyń jartysynda óz saıttarynyń bolmaýyna baılanysty shıelenisip tur.