Oblystar óńirlik nyshanynyń sıpattamasy men paıdalaný tártibin ózderi aıqyndaıtyn bolady
«Búgingi kúni «Qazaqstan Respýblıkasy astanasynyń mártebesi týraly» jáne «Almaty qalasynyń erekshe mártebesi týraly» Qazaqstan Respýblıkasynyń zańdaryna sáıkes óńirlik nyshandardyń sıpattamasyn jáne olardy paıdalaný tártibin aıqyndaý quzyreti Astana jáne Almaty qalalarynyń máslıhattarynda ǵana qarastyrylǵan. Basqa óńirlerge qatysty bul másele zańnamalyq turǵydan rettelmegen. Osyǵan oraı Sizdiń usynysyńyzdy «Qazaqstan Respýblıkasyndaǵy jergilikti ózin-ózi basqarý týraly» jáne oǵan ilespe «Qazaqstan Respýblıkasynyń keıbir zańnamalyq aktilerine jergilikti ózin-ózi basqarý týraly» zań jobalaryn Parlamentte talqylaý barysynda birlesip pysyqtaýdy usynamyz. Zań jobalaryn Parlament qaraýyna osy jylǵy jeltoqsanda engizý josparlanǵan», - dedi Álıhan Smaıylov jaýabynda.
Onyń atap ótýinshe, jergilikti atqarýshy organdarǵa jáne máslıhattarǵa ádistemelik qoldaý kórsetý maqsatynda Mádenıet jáne sport mınıstrligi óńirlik nyshandardy ázirleý jáne bekitý jónindegi úlgilik erejeniń jobasyn daıarlady.
Qazirgi ýaqytta Mádenıet jáne sport mınıstrligi óz quzyretin úlgilik erejeni bekitý máselesimen tolyqtyrý tetikterin pysyqtap jatyr.
«Barlyq ákimdikter janynda memlekettik rámizder jónindegi komıssııa jumys jasaıtynyn eskere otyryp, óńirlik nyshandardy ázirleý jáne paıdalaný máselelelerin atalǵan konsýltatıvti-keńesshi organdardyń aıasynda qarastyrýdy oryndy dep sanaımyz. Sonymen qatar 2023 jylǵa memlekettik rámizderdi paıdalaný jáne geraldıkalyq máseleler boıynsha jumystardy nasıhattaý boıynsha is-sharalar josparyna sáıkes kelesi jyly óńirlik nyshandarǵa arnalǵan semınarlar uıymdastyrylady», - dedi Úkimet basshysy.