Oblysta ólim-jitim 16%-ǵa azaıdy - Aıdarbek Saparov

ASTANA. QazAqparat – Soltústik Qazaqstan oblysynyń medıtsınalyq mekemelerin qural-jabdyqtarmen jabdyqtaýǵa 5,5 mlrd teńge bólindi. Bul týraly oblys basshysy Aıdarbek Saparov málim etti, dep habarlaıdy QazAqparat tilshisi.

«Densaýlyq saqtaý salasyn qarjylandyrýdyń jyl saıynǵy ulǵaıýy arqasynda dıagnostıka deńgeıi men medıtsınalyq qyzmet kórsetý sapasy jaqsardy. Jalpy, ólim-jitim deńgeıi 16%-ǵa azaıdy. Onyń ishinde qan aınalymy júıesi aýrýlarynan 12%-ǵa, ınsýltterden 24%-ǵa, týberkýlezdiń taralýynan 5%-ǵa tómendedi. Densaýlyq saqtaý salasyn qarjylandyrý bıyl 56%-ǵa ulǵaıyp, jalpy somasy 17 mıllıard teńgege jetti», - dedi Aıdarbek Saparov OKQ-de ótken brıfıngide.

Ákimniń aıtýynsha, «Aýyldaǵy densaýlyq saqtaýdy jańǵyrtý» ulttyq jobasy aıasynda óńirde 46 medıtsınalyq nysan salý josparlanǵan. Bul - feldsherlik-akýsherlik pýnktter, dárigerlik ambýlatorııalar men medıtsınalyq pýnktter. Óńirdi damytýdyń keshendi josparyn iske asyrý sheńberinde kúzde qalanyń jańa shaǵyn aýdandarynda aýysymyna 250 adam qabyldaıtyn 2 emhana ashylady. Ýálıhanov aýdanynyń ákimshilik ortalyǵy – Kishkenekól aýylynda 250 adam qabyldaıtyn emhananyń qurylysy bastaldy.

Sondaı-aq, óńir ákimi medıtsınalyq mekemelerdi qural-jabdyqtarmen jabdyqtaýǵa 5,5 mıllıard teńge bólingenin aıtty. Sanıtarlyq avtokólik parki jańartylyp, jyl basynda aýdandyq aýrýhanalarǵa 14 sanıtarlyq kólik berildi. Taǵy 18 kólik satyp alý josparlanyp otyr.

«Kadr tapshylyǵy máselesin sheshý úshin kótermeaqy mólsheri ulǵaıtyldy. Anestezıolog-reanımatologter, akýsher-gınekologter, onkologter sııaqty asa suranysqa ıe mamandyqtardyń dárigerleri 5 mıllıon teńge mólsherinde birjolǵy tólem alady», - deıdi A. Saparov.