Oblys ortalyqtary men iri qalalardyń dızaın kody ázirlenip jatyr

ASTANA. QazAqparat – Dızaın kod jergilikti jerdiń ereksheligin eskere otyryp, birtutas kórinisti anyqtaý arqyly qalany ózgertýge múmkindik beredi. Bul týraly QazAqparat Indýstrııa jáne ınfraqurylymdyq damý mınıstrligine silteme jasap habarlaıdy.

Qalalardy keshendi qurylys salý standarttaryna beıimdeý sheńberinde shaǵyn sáýlet túrleri men abattandyrý tásilderin qoldana otyryp, respýblıkalyq mańyzdaǵy qalalardyń, oblys ortalyqtary men halyq sany 100 myńnan asatyn iri qalalardyń dızaın jobalaryn (kodtaryn) daıyndaý jumystary qolǵa alyndy.

Dızaın kod jergilikti jerdiń ereksheligin eskere otyryp, qalalyq keńistiktiń birtutas kórinisin anyqtaý arqyly ony ózgertýge múmkindik beredi. Bul rette dızaın kod daıyndaý jumysyna ǵımarattardyń qasbetin árleý, ınfraqurylym júıelerine dızaın elementterin engizý, sondaı-aq jekelegen fýnktsıonaldy aımaqtarǵa, abattandyrý, kógaldandyrý jáne navıgatsııa júıeleri men mańdaıshalarǵa kontseptýaldy sheshimder men tásilder qoldanylady.

Qazir Astana, Almaty jáne Aqtóbe qalasynyń dızaın kody ázirlengen. Qalǵan qalalar boıynsha jańa standarttarǵa sáıkes daıyndalyp jatyr.

Vedomstvodan atap ótkendeı, dızaın kod stılıstıkalyq turǵydan birtutas, jaıly jáne qaýipsiz qalalyq ortany nemese keńistikti qolaıly qalyptastyrýǵa múmkindik beretin erejeler, talaptar men usynystardyń jıyntyǵy sanalady.